काठमाडौँ ।अर्थमन्त्री डा.प्रकाशशरण महतले तीन वटा सरकारी बैंकका सीईओलाई भदौ महिनाका लागि आफू खुसी ब्याजदर वृद्धि गरेकोमा स्पष्टीकरण सोधेका छन् ।
पर्याप्त तरलता हुँदाहुँदैपनि थप ब्याजदर वृद्धि गरेर लगानीको वातावरण धुमिल बनाएको भन्दै अर्थमन्त्री महतले कृषि विकास बैंक, राष्ट्रिय वाणिज्य बैंक र नेपाल बैंकका सीईओलाई स्पष्टीकरण सोधेका हुन् ।
अर्थमन्त्री महतले सरकारी बैंकले नै किन सरकारको ब्याजदर घटाउने नीतिलाई असफल बनाउन खोजेको भन्दै कृषि बैंकका अध्यक्ष रामशरण पुडासैनीसँगै सीईओ गोविन्द गुरुङ, वाणिज्य बैंकका अध्यक्ष बलराम पाठक र सीईओ किरणकुमार श्रेष्ठ र नेपाल बैंकका अध्यक्ष ज्ञानप्रसाद ज्ञवालीसहित सीईओ कृष्णबहादुर अधिकारीलाई कारण सोधका हुन् ।
बैंकका प्रतिनिधिहरुले जवाफमा प्रतिस्पर्धी बजारमा निक्षेप जोगाउन ब्याजदर बढाउनुपरेको बताएका छन् । तर, निक्षेपमा ब्याजदर बढाएपनि कर्जामा भने ब्याजदर नबढाउने प्रतिबद्धता तीनवटै बैंकले गरेको स्रोतले बताएको छ । तर तीनवटै बैंकले कर्जामा भने ब्याजदर नबढाउने प्रतिबद्धता गरेका बताईएको छ।
बिहीबार बैंकहरुले भदौको लागि ब्याजदर बढाएको सूचना प्रकाशित गरेका थिए । जसमा नेपाल बैंकले साउनको तुलनामा भदौमा करिब २ प्रतिशतले ब्याजदर बढाएर मुद्दती निक्षेपमा १०.८९६ प्रतिशत बनाएको छ । कृषि विकास बैंकले पनि सोही ब्याजदर निर्धारण गरेको छ भने राष्ट्रिय वाणिज्य बैंकले ९.९९० प्रतिशत बनाएको छ ।
