काठमाडौँ । नेपाल नागरिक उड्डयन प्राधिकरणले नेपालका पहाडी क्षेत्रमा अवस्थित सर्ट टेक अफ एन्ड ल्यान्डिङ (स्टल) विमानस्थलमा हुने उडान सञ्चालनलाई थप सुरक्षित र व्यवस्थित बनाउन विभिन्न निर्णय गरेको छ ।
स्टल विमानस्थलमा अतिरिक्त समयमा उडान सञ्चालनपूर्व गन्तव्य, हवाई मार्ग र वैकल्पिक विमानस्थलमा भएको मौसमको भीएमसी मिनिमा कायम भएको सुनिश्चित गरी प्रमुख चालक र डिस्प्याचरको लिखित घोषणापश्चात मात्र उडान अनुमति प्रदान गरिने प्राधिकरणले जनाएको छ ।
प्राधिकरणका अनुसार स्टल विमानस्थलमा उडान गर्दा प्रत्येक उडानमा सीएए नेपाल सिएआर (२) भएका भीएमसी (भिजिबिलिटी एन्ड डिस्टेन्स फ्रम क्लाउड मिनिमा) को सुनिश्चितता पश्चात पीआईसी सम्पूर्णरुपमा सन्तुष्ट हुनु पर्नेछ ।
त्यस्तै नेपालगञ्ज विमानस्थलबाट स्टल विमानस्थलमा उडान गर्ने वायुसेवा कम्पनीले नेपालगञ्ज विमानस्थलमा अनिवार्य फ्लाइट अपरेसन अफिसर (एफओओ) को व्यवस्था गर्नुपर्ने र फ्लाइट अपरेसन सम्बन्धी सम्पूर्ण कार्य एफओओमार्फत गर्नु पर्नेछ ।
प्राधिकरणले पहाडी क्षेत्रका विमानस्थलका साथै सम्पूर्ण स्टल विमानस्थलहको सञ्चालन समय पुनरावलोकन गर्ने तथा आकाश मार्गमा हुँदा मौसमको उपलब्धताबारे अध्ययन गर्न प्राधिकरणका उपमहानिर्देशकको संयोजकत्वमा एउटा उच्चस्तरीय समिति गठन गरेको छ ।
