काठमाडौँ । नेपाल चिकित्सक संघले नेपाल मेडिकल काउन्सिलका पदाधिकारी र सीआइबीका अनुसन्धानकर्तामाथि छानबिन र कारबाहीको माग गरेको छ।
चिकित्सक संघले आज एक विज्ञप्ति जारी गर्दै निर्दोष चिकित्सकलाई पक्राउ गरी उनको मानमर्दन गरेको, मानसिक तनाव दिएको भन्दै त्यसमा संलग्न काउन्सिलका पदाधिकारी र सीआईबीका अनुसन्धानकर्तामाथि छानबिन र कारबाहीका लागि माग गरेको हो ।
संघको आजीवन सदस्य रहेका डा रन्जीतकुमार यादवलाई पक्राउ गरी मानमर्दन गरेको र न्यूनतम मानवअधिकार हनन गरेको घटनामा ध्यानाकर्षण भएको संघले जनाएको छ ।
संघले नक्कली डाक्टर पक्राउ गर्ने नेपाल प्रहरीको अभियानका क्रममा काउन्सिलका अधिकारीले गलत विवरण उपलब्ध गराएको र सीआईबीले सोही व्यक्तिलाई पक्राउ गरेको भन्दै सो घटनामा संलग्नमाथी छानबिन र कारबाहीको माग गरेको हो।
“घटनालाई गम्भीररुपमा लिई कानूनी कारबाही अघि नबढाइएको अवस्थामा नेपाल चिकित्सक संघ यथाशीघ्र कडा कदम चाल्न बाध्य हुनेछ”, संघद्वारा जारी विज्ञप्तिमा भनिएको छ ।
