काठमाडौँ । राष्ट्रिय प्रजातन्त्र पार्टी (राप्रपा)का प्रवक्ता मोहनकुमार श्रेष्ठले पोखरा महानगरपालिकाले मध्यरातमा छापमार शैलीमा पृथ्वीनारायण शाहको शालिक हटाएको भन्दै असन्तुष्टि जनाएका छन् ।
प्रवक्ता श्रेष्ठले शनिबार सामाजिक सञ्जालमार्फत महानगरपालिकाले शालिक हटाउनु दुःखद, निन्दनीय र आपत्तिजनक रहेको बताएका हुन् ।
उनले भनेका छन्ः ‘पोखराको पृथ्वी चोकमा बुधबार केही उच्छृङ्खल समूहले सडकमा फालेको पृथ्वीनारायण शाहको प्रतिमा बिहीबार राप्रपाका युवा लगायतले पुनःस्थापना गरेको र शुक्रबार मध्यरातमा पोखरा महानगरले छापामार शैलीमा फेरि हटाएको खबर दुःखद, निन्दनीय र आपत्तिजनक छ।’
यस्तै, श्रेष्ठले पृथ्वीनारायण शाह राजसंस्था नमान्ने गणतन्त्रवादीहरुका पनि राष्ट्रनिर्माता भएको जिकिर गर्दै उनको शालिकमाथि भइरहेको अपमान स्वाभिमानी नेपालीको समेत अपमान भएको बताएका छन् ।
‘पृथ्वीनारायण शाह त राजसंस्था नमान्ने गणतन्त्रवादीहरुका पनि राष्ट्रनिर्माता हुन्, नेपाली हुँ भनेर गर्व गर्नेले इतिहासको अपमान सहन हुँदैन । पोखरामा उहाँको शालिकमाथि भइरहेको अपमान स्वाभिमानी नेपालीको अपमान हो । आफ्नो गौरवशाली इतिहासमाथिको अपमानमा मौनता साँधेर नबसौं, उठौं, जागौं’ प्रवक्ता श्रेष्ठले भनेका छन् ।
पृथ्वीनारायण शाहको शालिकमाथिको निरन्तरको वक्रदृष्टि कुनै एउटा पार्टीको विषय मात्रै नभएको बताउँदै प्रवक्ता श्रेष्ठले राष्ट्रनिर्माताको यथोचित सम्मान हरेक राजनीतिक दल र देशभक्त नागरिकको साझा विषय हुनपर्नेमा जोड दिएका छन् ।
बुधबार एक समूहले पोखराको पृथ्वी चोक (लखन चोक)मा रहेको पृथ्वीनारायण शाहको शालिक सडकमा फालेको थियो । सडकमा फालिएको शाहको प्रतिमा बिहीबार राप्रपाका कार्यकर्ताले पुनःस्थापना गरेका थिए ।
