काठमाडौं । प्रधानमन्त्री केपी शर्मा ओलीले गत शुक्रबार तेस्रो कार्यकालका लागि प्रधानमन्त्रीमा नियुक्त हुँदा शपथग्रहण गर्नुभयो ।
उहाँलाई राष्ट्रपति विद्यादेवी भण्डारीले गराएको त्यस शपथविरूद्ध सर्वोच्च अदालतमा रिट पेश भएको छ ।
प्रधानमन्त्री केपी शर्मा ओलीले शुक्रबार पद तथा गोपनीयताको शपथ ग्रहण गर्दा दुइटा महत्वपूर्ण अंश भन्न छुटाउनुभएको थियो ।
‘मुलुक र जनताप्रति पूर्ण बफादार रही सत्य निष्ठापूर्वक यो प्रतिज्ञा गर्छु कि’ भनेर राष्ट्रपति विद्या भण्डारीले शपथ गराउँदा ओलीले ‘यो प्रतिज्ञा गर्छु कि’ भन्ने वाक्यांश छुटाउनुभएको थियो ।
प्रधानमन्त्री ओलीले छुटाएको उक्त वाक्यांश राष्ट्रपति भण्डारीले दोहोर्याउनु भएपनि ओलीले भने 'त्यो पर्दैन' भन्दै शपथग्रहण अगाडि बढाउनुभएको थियो । उहाँको त्यस्तो जवाफ सुनेर राष्ट्रपति हास्नुभएको थियो ।
त्यसपछि ओलीले शपथमा प्रयोग भएको 'ईश्वर' भन्ने शब्द पनि उच्चारण गर्नुभएको थिएन ।
