काठमाडौं । तत्कालीन प्रधानमन्त्री केपी शर्मा ओलीको पालामा संवैधानिक परिषदको सिफारिसमा नियुक्त भएका ५२ जना पदाधिकारीको नियुक्ति खारेजीको माग गर्दै परेका रिटहरूमाथि संवैधानिक इजलासमा आज सुनुवाइ हुँदैछ ।
न्यायाधीश हरि फुयाँलको एकल इजलासले १७ भदौ २०७८ मा संवैधानिक परिषदसम्बन्धी अध्यादेश र त्यसका आधारमा भएको नियुक्ति सम्बन्धी मुद्दाको सुनुवाइ स्थगित गर्न आदेश दिएको थियो । न्यायाधीश फुयाँलको एकल इजलासको अन्तरिम आदेशका कारण अवरुद्ध ५२ संवैधानिक पदाधिकारी नियुक्ति विरुद्धको मुद्दा माथी सुनुवाई हुन लागेको हो । अधिवक्ता डा. गणेश रेग्मीले दर्ता गरेको रिट निवेदनमा बिभिन्न संवैधानिक निकायमा भएका नियुक्तिको प्रक्रिया नपुगेको दाबी गर्दै खारेज गर्न माग गरिएको छ ।
संवैधानिक परिषदको त्तकालीन बैठकले बिभिन्न निकायमा नियुक्ति गरेको थियो तर त्यस बैठकमा तत्कालीन प्रधानमन्त्री केपी शर्मा ओली, तत्कालीन प्रधानन्यायाधीश चोलेन्द्र शम्शेर जबरा र राष्ट्रियसभा अध्यक्ष गणेश प्रसाद तिमिल्सिना सहभागी हुनु भएको थियो भने सभामुख अग्निप्रसाद सापकोटा र तत्कालीन विपक्षी दलका नेता शेरबहादुर देउवा बैठकमा अनुपस्थित रहनु भएको थियो ।
पार्टी भित्रको कलहका कारण सबैधानिक परिषद्को बैठक प्रभाबित भएको भन्दै तत्कालीन प्रधानमन्त्री ओलीले अध्यादेश मार्फत संवैधानिक परिषद्को कार्यबिधी परिमार्जन गर्नुभएको थियो ।
