काठमाडौं: संवैधानिक परिषदको सचिवालयले पाँच संवैधानिक निकायका प्रमुख एवं सदस्य पदका लागि आवेदन दिन सार्वजनिक सूचना प्रकाशन गरेको छ ।
संवैधानिक परिषद (कार्यविधि) नियमावली २०६८ अनुसार प्रकाशित उक्त सूचनामा रिक्त महालेखा परीक्षक, निर्वाचन आयोगका आयुक्त एक जना, राष्ट्रिय प्राकृतिक स्रोत तथा वित्त आयोगमा रिक्त एक जना सदस्य तथा मुस्लिम आयोगमा रिक्त एक जना सदस्य पदका लागि आवेदन दिन भनिएको छ ।
परिषदको हालै सम्पन्न बैठकले गरेको निर्णय बमोजिम नेपालको संविधान बमोजिम योग्यता पुगेका व्यक्तिहरुको अभिलेख तयार गर्न सूचना प्रकाशन गरिएको हो ।
संवैधानिक निकायको पदमा नियुक्त हुन योग्यता पुगेका इच्छुक नेपाली नागरिकले आफ्नो विवरण संलग्न गरी पन्ध्र दिनभित्र निवेदन दिन भनिएको छ ।
तथापि यो अभिलेख (रोस्टर) मात्र भएको र योग्य व्यक्तिमध्येका व्यक्तिलाई संवैधानिक निकायहरुमा नियुक्त गरिने छ ।
