एजेन्सी । घरेलु टोली वेस्टइन्डिजले टि २० आईमा भारतलाई चार रनले हराउदै रोमाञ्चक जित हात पारेको छ । पाँच टि२० आई सिरिजको पहिलो खेलमा भारतलाई हराएसँगै स्टइन्डिजले १–० को अग्रता लिएको छ ।
वेस्टइन्डिजले दिएको १ सय ५० रनको मध्यम विजयी लक्ष्य पछ्याएको भारतले निर्धारित २० ओभरमा ९ विकेट गुमाउँदै १ सय ४५ रन बनायो। भारतका लागि डेब्यू गरेका बायाँ हाते ब्याटर तिलक बर्माले सर्वाधिक ३९ रन बनाए ।
भारतलाई जितको लागि अन्तिम ओभरमा १० रन चाहिँएको थियो । त्यसअघि १२ बलमा २१ रन चाहिँदा अर्शदीप सिंहले तेस्रो र चौथो बलमा लगातार चौका प्रहार गर्दै भारतलाई जितको सम्भावना देखाएका थिए ।
अन्तिम ओभरको पहिलो बलमै वेस्टइन्डिजका रोमारियोले कुलदीप यादवलाई योर्कर बलमा ३ रनमा बोल्ड आउट गरे । युजभेन्द्र चहलले दोस्रो बलमा एक रन बटुले । तेस्रो बलमा अर्शदीपले दुई रन बटुले ।
अन्तिम तीन बलमा भारतलाई जितको लागि ७ र सुपर ओभरमा लैजान ६ रन चाहिँएको थियो । चौथो बल डट र पाँचौं बलमा दुई रन लिनेक्रममा अर्शदीप रन आउट भएपछि भारतको जितको सम्भावना लगभग सकिएको थियो । वेस्टइन्डिजले अन्तिम बल पनि योर्करका साथ जित पक्का गराए ।
भारतका ओपनर शुभमन गिल ओभरको दोस्रो बलमै ३ रनमा स्टम्पिङ आउट भएका थिए । ईशान किशनलाई ६ रनमा क्याच आउट हुँदा सूर्यकुमार यादव २१ बलमा २ चौका र १ छक्कासहित २१ रनमा पेभेलिएन फर्केका थिए । यस्तै, हार्दिक पान्ड्या १९ बलमा ३ चौका प्रहार गर्दै १९ रनमा बोल्ड आउट हुँदा सन्जु स्यामसनलाई १२ रनमा रन आउट भए ।
वेस्टइन्डिजको जितमा जेसन होल्डरले ४ ओभरमा १ मेडनसहित १९ रन खर्चेर २ विकेट लिए । त्यसैगरी, रोमारियो शेफर्ड र ओबेद म्याककोयले समान दुई दुई विकेट लिदा अकिल हुसैनले १ विकेट लिए ।
त्यसअघि ब्रायन लारा क्रिकेट स्टेडियममा टस जितेर पहिला ब्याटिङ रोजेको वेस्टइन्डिजले निर्धारित २० ओभरमा ६ विकेट गुमाउँदै १ सय ४९ रन बनाएको थियो ।
वेस्टइन्डिजका कप्तान रोभम्यान पावेलले सर्वाधिक ४८ रनको योगदान दिए । ओपनर कायल मेयर्स १ रनमा एलबीडब्लू आउट भएका थिए । मेयर्स आउट भएपछि किंग २८ रनमा आउट भए ।
यस्तै, जोनसन चाल्र्स ३ रनमा क्याच आउट हुँदा निकोलस पुरन ३४ बलमा २ चौका र २ छक्कासहित ४१ रनमा आउट भए । शिम्रन हेटमायर १२ बलमा १ चौकासहित १० रन बनाए ।
भारतका युजभेन्द्र चहल र अर्शदीप सिंहले समान दुई दुई विकेट लिए । हार्दिक र कुलदीप यादवले समान एक एक विकेट लिए ।
पाँच टि२० आई को दोस्रो खेल आइतबार, तेस्रो मंगलबार, शनिबार र आइतबार हुनेछ ।
