काठमाडौं । वागमती प्रदेशअन्तर्गतको रिक्त राष्ट्रियसभा सदस्यको उपनिर्वाचनमा नेकपा (माओवादी केन्द्र)ले डा. खिमलाल देवकोटालाई मतदान गर्न ह्वीप जारी गरेको छ ।
सोमबार माओवादी केन्द्रका वागमती प्रदेश सहइन्चार्ज हितमान शाक्य, प्रदेश अध्यक्ष नारायण दाहाल, र संसदीय दलका नेता शालिकराम जमकट्टेलले संयुक्त विज्ञप्ति जारी गर्दै विपक्षी गठबन्धनबाट साझा उम्मेदवारका रूपमा अघि सारिएका देवकोटालाई मतदान गर्न ह्वीप जारी गरेका हुन् ।
विज्ञप्तीमा भनिएको छ,
बागमती प्रदेशबाट राष्ट्रिय सभाका लागि प्रतिनिधित्व गर्ने सदस्य रामबहादुर थापा नेपाल कम्युनिष्ट पार्टी (माओवादी केन्द्र) को तर्फबाट प्रतिनिधित्व गर्ने गरी विगतमा निर्वाचित भएको कुरा अवगत नै छ । यस विचमा निज राम बहादुर थापाले पार्टीको नीति, विधि र अनुशासन नमानि प्रतिगमनकारी तत्वको मतियार भई गणतन्त्र, संघीयता र संविधान विरोधी गतिविधिमा लागेकाले पार्टीले राष्ट्रिय सभा सदस्यबाट कारवाही गरेकोले उक्त स्थान खाली हुन गयो ।
उक्त खाली स्थानमा हाम्रो पार्टी नेपाल कम्युनिष्ट पार्टी (माओवादी केन्द्र), नेपाली कांग्रेस लगायतका अन्य पार्टीहरुको समर्थन र सहयोगमा साझा उम्मेद्वारको रुपमा डा. खिमलाल देवकोटाले उम्मेदवारी दिनु भएको छ । संघीयता, गणतन्त्रका उपलब्धिहरुलाई नीतिगत ढंगले सुदृढ गर्ने स्थान राष्ट्रिय सभामा यस विषयका विज्ञ ज्ञाता र सक्षम व्यक्तित्व डा. खिमलाल देवकोटालाई विजय गराउनु हामी संघीयता पक्षधरहरुको दायित्व बन्न आउँछ । त्यसैले बागमती प्रदेश सभाका सबै माननीय सदस्यहरु, महानगरपालिका, उपमहानगरपालिका, नगरपालिका र गाउँपालिकाका सबै आदरणीय प्रमुख अध्यक्ष र उप प्रमुख उपाध्यक्षलाई कलम चुनाव चिन्हमा मतदान गरी डा. खिमलाल देवकोटालाई विजयी गराउन हाम्रो पार्टी नेपाल कम्युनिष्ट पार्टी (माओवादी केन्द्र) बागमती प्रदेश समिति हार्दिक अनुरोध गर्दछ ।
