काठमाडौं । नेकपा एमालेको भ्रातृ अनेरास्ववियुले सुन तस्करी काण्डका मुख्य नाइकेलाई पक्राउ गर्न माग गर्दै काठमाडौंमा टर्चलाइट जुलुस निकालेको छ ।
क्विन्टलका क्विन्टल सुन तस्करी हुँदा पनि सरकारले आँखा चिम्लिएको भन्दै अनेरास्ववियुले बुधबार साँझ काठमाडौंमा टर्चलाइट जुलुस निकालेको हो ।
अनेरास्ववियुले सय किलो सुन तस्करी काण्डको अनुसन्धानका लागि उच्चस्तरीय छानबिन समिति गठन गर्न माग गरेको छ । अनेरास्वबियूले सरकारले नै तस्करहरुको संरक्षण गरेका आरोप पनि लगाएको छ ।
प्रदर्शनमा सहभागी अनेरास्ववियुका नेता-कार्यकर्ताले सुन तस्करीका मुख्य नाइकेलाई पक्राउ गर, उच्चस्तरीय छानबिन समिति गठन गर, तस्करलाई संरक्षण गर्ने सरकार मुर्दावाद, संसद् सुचारु गर, तस्करहरु कहाँ छ सिंहदरबारभित्र छ, तस्कर कहाँ छन् पेरिसडाँडामा छन् लगायत नारा समेत लगाएका थिए ।
