काठमाडौं । नेकपा एमाले लुम्बिनी प्रदेश कमिटी सचिवालय सदस्य सतमान पुनमगरको कोरोना संक्रमणबाट निधन भएको छ । ६० वर्षीय पुनको मंगलबार बिहान बाँकेको कोहलपुरस्थित नेपालगन्ज मेडिकल कलेजमा उपचाररत मृत्यु भएको हो ।
उनलाई केही दिनअघि कोरोना पुष्टि भएसंगै श्वासप्रश्वासमा समस्या देखिएपछि वैशाख ३१ गते जिल्ला अस्पताल रुकुम पश्चिम ल्याइएकोमा अवस्था जटिल भएको भन्दै त्यहाँबाट कोहलपुर पठाइएको एमाले लुम्बिनी प्रदेशका सचिव खेममान खड्काले जानकारी दिए ।
हाल रुकुम पूर्वको भूमि, व्यवस्था तथा सुकुम्बासी आयोगका अध्यक्ष रहेका उनी २०४९ देखि २०५४ सालसम्म जिल्ला विकास समिति रुकुमका सदस्य थिए ।उनलाई जेठ १ गते हेलिकप्टरबाट कोहलपुर लगिएको हो । पुन पुथाउत्तरगंगा गाउँपालिका–१० का स्थायी बासिन्दा हुन् ।
यस्तै डा. मुकेश चौधरीको पनि कोरोना भाइरसकै संक्रमणबाट निधन भएको छ । लहानका हाड नसाका ३५ वर्षीय डा. चौधरीको विराटनगरस्थित नोबेल अस्पतालमा उपचारकै क्रममा आज विहान निधन भएको हो ।
डा. चौधरी लहान डाइग्नोस्टिक सेन्टरको प्रोप्राइटर थिए । कोरोना महामारीमा पनि उनी विरामीको उपचार गर्दै आएका कारण संक्रमित बनेको थियो ।
उनको निधनले लहानका धेरै मानिसले दुःख व्यक्त गर्दै सामाजिक सञ्जालमा श्रद्धाञ्जली दिएका छन् ।
