काठमाडौँ । नेकपा (एमाले) ले सुन प्रकरणको छिनोफानो नभएसम्म सदन चल्न नदिने अडान राखेको छ । प्रतिनिधिसभाको आज बस्ने बैठक पनि एमालेको उक्त अडानका कारण अवरोध हुने भएको छ ।
एमाले अध्यक्ष केपी शर्मा ओलीसँगको भेटमा प्रधानमन्त्री पुष्पकमल दाहाल प्रचण्डले सुन प्रकरणबारे स्पष्ट जवाफ नदिएकाले आज सदन चल्न नदिने एमालेका प्रमुख सचेतक पदम गिरीले जानकारी दिनुभयो ।
उहाँका अनुसार पार्टी अध्यक्ष ओलीले प्रधानमन्त्रीलाई सुन प्रकरणको छानबिनका लागि उच्चस्तरीय छानबिन समिति बनाउनुपर्ने र त्यसको जिम्मेवारी गृहमन्त्रीले लिनुपर्ने कुरा राख्दा प्रधानमन्त्रीबाट स्पष्ट जवाफ आएन र समिति गठनका लागि पनि आनाकानी गर्नुभएको थियो ।
प्रमुख सचेतक गिरीले सुन प्रकरणको छिनोफानो नभएसम्म सदन चल्न नसक्ने बताउनुभयो । एमलेले विमानस्थल बाहिरबाट ठूलो परिणामको सुन बरामद भएपछि यसमा गृहमन्त्रीकै संलग्नता भएको आरोप लगाउँदै राजीनामा माग्दै आएको छ । गृहमन्त्रीले राजीनामा नदिएसम्म एमालेले सदन चल्न नदिने अडान राखेको छ ।
