एजेन्सी । फिफा महिला विश्वकप २०२३ अन्तर्ग मोरक्कोले आइतबार दक्षिण कोरियालाई १–० गोलले पराजित गर्यो । विजयी बनेको टोलीको डिफेन्डर नौहाइला बेन्जिनाले सबैको ध्यान केन्द्रित गरिन् । बेन्जिना विश्वकपमा हिजाब लगाउने पहिलो खेलाडी बनेकी हुन् ।
२५ वर्षीया बेन्जिमाले इस्लामिक हेडस्कार्फ लगाएर मैदान उत्रिएकी थिइन् । फिफाले सन् २०१४ मा हिजाब लगाएर विश्वकप खेल्न अनुमति दिएको थियो ।
मोरक्कोले यसै महिला विश्वकपबाट डेब्यु गरेको छ । मोरक्कोमा आफ्नो क्लब फुटबल खेल्ने बेन्जिना सिनियर महिला अन्तर्राष्ट्रिय प्रतियोगितामा हिजाब लगाउने पहिलो खेलाडी समेत हुन् । यसअघि उनी जर्मनीविरुद्धको खेलमा बेन्चमा थिइन् । उक्त खेलमा मोरक्को ६–० गोलले पराजित भएको थियो ।
समूह ‘एच’मा रहेको मोरक्को एक जितसहित ३ अंकका साथ तालिकाको तेस्रो स्थानमा रहेको छ । एक–एक खेलबाट ३–३ अंक जोडेका जर्मनी र कोलम्बिया क्रमश: पहिलो र दोस्रो स्थानमा रहेका छन् । कोरिया भने अंकविहिन रहँदै पुछारमा छ ।
