काठमाडौं । नेपाली काँग्रेसका प्रवक्ता एवं अर्थमन्त्री डा.प्रकाशशरण महतले काँग्रेस सांसद सुनिल शर्माले आफ्नो अस्पताल (नोबेल मेडिकल कलेज) लाई स्वास्थ्य बीमा कार्यक्रम दिनुपर्छ भन्ने कुरा नभनिदिएकाले जथाभावी बोलेको आरोप लगाउनुभएको छ ।
बुधवार पार्टी केन्द्रिय समिति बैठकका निर्णय सुनाउने क्रममा उहाँले यस्तो बताउनुभएको हो । उहाँले सांसद शर्माको अस्पताल रहेको र सोही अस्पताललाई स्वास्थ्य बीमा कार्यक्रम दिनका लागि भनिदिन आफूसँग आग्रह गरेपनि आफूले विधिसम्मत रुपमा हुने भनेपछि रिसाएर जथाभावी बोलेको बताउनु भयो ।
उहाँले सांसद शर्माले अनुशासनहीन अभिव्यक्ति दिएको भन्दै कारबाही हुने बताउनुभयो । यद्यपी उहाँले कस्तो कारबाही हुने भन्ने बारेमा केही बताउन चाहनु भएन ।
सांसद शर्माले प्रतिनिधि सभाको बुधवारको बैठकमा उपप्रधान एवं गृहमन्त्री नारायणकाजी श्रेष्ठ र अर्थमन्त्री डा. प्रकाशशरण महतले विमानस्थलबाट भएको सुन तस्करीलाई लिएर नैतिकताका आधारमा राजीनामा दिनुपर्ने अभिव्यक्ति दिनुभएको थियो । साथै उहाँले दुबै माथि कारबाही नगरे संसदमै अनसन बस्ने घोषणा गर्नु भएको थियो ।
उहाँले भन्नुभयो, ‘यही हो, अराजकता, अनुशासनहीनताको चरम । उहाँको हस्पिटल छ, स्वास्थ्य बीमा बोर्ड भन्ने स्वास्थ्य मन्त्रालयको छुट्टै संरचना छ । कसले बीमा पाउने, नपाउने विषयमा हामीले पनि पाउनुपर्छ भन्ने उहाँको कुरा थियो । मैले उहाँसँग यो बीमा बोर्डले निर्णय गर्छ, तै पनि यो समान हिसावले कसैलाई दिने, कसैलाई नदिने नहोस् भनेर भनेको थिएँ । उहाँको के भनाइ थियो भने मैले भनिदियो भने तुरुन्तै भइहाल्छ । तुरुन्तै तपाईले नभनेर मात्रै नभएको । म राणा कालको शासक होइन की बोल्दै भइहाल्छ, त्यसको प्रक्रिया हुन्छ । संस्थागत संरचना छ । त्यो नहुने बित्तिकै उहाँ भड्केर जथाभावी हिँड्नुभयो ।’
प्रवक्ता महतले पार्टी अनुशासनविपरित काम गर्नेलाई पार्टीले कारबाही गर्ने बताउनु भयो ।
