एजेन्सी । बलिउड सुपरस्टार शाहरुख खानका फ्यानहरु उनको फिल्म ‘जवान’ को प्रतिक्षामा छन् । फिल्मसँग सम्बन्धित हरेक अपडेटले किंग खानका फ्यानहरुको बेचैनी बढाइरहेको छ । ‘जवान’ को रिलिज मिति नजिकिदै गर्दा प्रचारप्रसार पनि तिब्र रुपमा सुरु भएको छ ।
प्रिभ्यु र क्यारेक्टर पोस्टरपछि अब फिल्मको पहिलो गीत ‘जिन्दा बन्दा’ रिलिज हुँदैछ । मिडिया रिपोर्टका अनुसार गीत बनाउन १५ करोड भारु खर्च भएको छ । बलिउडको इतिहासमा यो सबैभन्दा महँगो गीत हुने बताइएको छ ।
मिडिया रिपोर्टहरूका अनुसार, गीतको छायांकन चेन्नईमा पाँच दिनसम्म भव्य स्केलमा गरिएको छ, जसमा चेन्नई, हैदरावाद, बैंगलोर, मदुरै, मुम्बई र अन्य भारतीय शहरहरूका १००० भन्दा बढी डान्सरहरू सामेल हुनेछन् । १५ करोडभन्दा बढीको प्रभावशाली बजेटमा बनेको जिन्दा बन्दामा शाहरुख खान हजारौं नर्तकहरूसँग नाच्दैछन् ।
गीतको संगीत अनिरुद्धले गरेका हुन् । यससँगै उनले यस फिल्मको गीत पनि गाएका छन् भने स्टेपको कोरियोग्राफी शोबीले गरेका छन् । गीत कत्तिको भव्य हुने भन्ने अनुमान इन्टरनेटमा भइसकेको छ । गीतमा प्रियमणी वा अन्य कुनै साउथ स्टारको पनि क्यामियो हुनेछ भन्ने अनुमान धेरैले गरिरहेका छन् । अनिरुद्धले वाथी कमिङ, अरबी कुथु र हालै विक्रमको रेकर्ड तोड्ने एल्बम जस्ता हिट गीतहरू गाएका छन् ।
एटलीले जवानलाई निर्देशन गरेका छन् । फिल्ममा शाहरुखका अलावा नयनतारा, विजय सेतुपति, सान्या मल्होत्रा, प्रियमणी, गिरिजा ओक, सञ्जिता भट्टाचार्य, लेहर खान, आलिया कुरेशी, रिद्धी डोग्रा, सुनील ग्रोवर र मुकेश छाबराको अभिनय रहेको छ । फिल्म सेप्टेम्बर ७ मा हलमा रिलिज हुँदैछ ।
