काठमाडौँ । चिनियाँ कम्युनिष्ट पार्टीका पोलिटब्युरो सदस्य तथा छोङछिङ शहरका प्रमुख एवं सचिव युआन च्या च्युन २६ सदस्यीय टोलीको नेतृत्व गर्दै काठमाडौँ आइपुग्नुभएको छ ।
आइतबार पौने १२ बजे उक्त टोली त्रिभुवन अन्तराष्ट्रिय विमानस्थलमा अवतरण गरेको हो । उक्त टोली कोलम्बोबाट आएको श्रीलंकन एयरको जहाजमार्फत नेपाल आएको हो । टोलीलाई नेकपा (माओवादी केन्द्र) का महासचिव देव गुरुङ र यहाँस्थित चिनियाँ राजदूत छन सोङ्गलेले विमानस्थलको विशिष्ट कक्षमा स्वागत गर्नुभयो ।
युआनलाई राष्ट्रपति तथा चिनियाँ कम्युनिष्ट पार्टीका महासचिव सि चिनफिङका अति विश्वासपात्रमध्ये एक मानिन्छ ।
तीन दिने भ्रमण आएको युआनसहितको भिआइपी टोली बत्तीसपुतलीस्थित होटल द्वारिकाजमा बस्नेछ भने टोलीका अरु सदस्यको लागि म्यारियट होटलमा बस्ने प्रवन्ध मिलाइएको बताइएको छ ।
राजनीतिक भेटघाट गर्न आइपुग्नुभएका युआनले प्रधानमन्त्री पुष्पकमल दाहाल प्रचण्ड र नेकपा (एमाले) का अध्यक्ष केपी शर्मा ओलीसँग भने भेट हुने अवस्था छैन । प्रधानमन्त्री प्रचण्ड अहिले इटाली र एमाले अध्यक्ष ओली कम्बोडिया हुनुहुन्छ ।
चिनियाँ कम्युनिस्ट पार्टीका शीर्ष २५ नेतामध्येमा पर्ने युआन अन्तरिक्ष विज्ञानसम्बन्धी इन्जिनियर पनि हुनुहुन्छ । उहाँको भ्रमणको तयारीनिम्ति ३ वटा एड्भान्स टोली एक हप्ताबीच नेपाल आइसकेको बताइएको छ ।
