काठमाडौँ । नेपाल समाजवादी पार्टीका अध्यक्ष डा. बाबुराम भट्टराईले भ्रष्टाचाररूपी क्यान्सरको उपचार कुनै अलौकिक महापुरूषको अवतार वा परम्परागत झारफूकबाट मात्र सम्भब नहुने जनाउनु भएको छ ।
पछिल्लो सुन तस्करी प्रकरण बारे सामाजिक संञ्जालमा टिप्पणी लेख्दै नेता भट्टराईले बिमानस्थलको सुरक्षा घेरा नाघेर सय किलो सुन तस्करी हुनु सामान्य घटना नभएको उल्लेख गर्नुभएको छ ।
उहाँले लेख्नुभएको छ-
अन्तराष्ट्रिय विमानस्थलबाट त्यतिका जाचबुझका घेरा नाघेर सय किलो ( रू. ८४ करोड ) बराबरको सुन तस्करी हुनु सामान्य घटना हैन। यो पहिलो र अन्तिम पनि हैन ! केही समय यता चर्चामा आएका भ्रष्टाचारका घटनाहरूलाई मात्र जोडेर हेर्ने हो भने पनि देशमा भ्रष्टाचारको स्थिति भयावह देखिन्छ।
वेलावखत उठ्ने र लुक्ने ठूला भ्रष्टाचार प्रकरण त झन् कति भयावह होलान् कल्पना मात्र गर्न सकिन्छ।अतःदुसाध्य बनिसकेको भ्रष्टाचाररूपी क्यान्सरको उपचार कुनै अलौकिक महापुरूषको अवतार वा परम्परागत झारफूकबाट हैन राजनीति र प्रशासन र सुरक्षासंयन्त्र रन्यायालयको एकीकृत र निर्मम शल्यक्रिया र राज्यसंयन्त्रको संरचनात्मक सुधारमा खोज्न ढिलो नगरौं ! नत्र श्रीपशुपतिनाथले पनि हाम्रो रक्षा गर्न सक्नेछैनन् !
