काठमाडौँ । प्रधानमन्त्री पुष्पकमल दाहालको अनुरोधमा प्रतिनिधिसभाको बैठक दुई घण्टाका लागि पर सरेको छ ।
सभामुख देवराज घिमिरेसँग टेलिफोन संवादमा प्रधानमन्त्री प्रचण्डले बैठक सार्न आग्रह गरेपछि आइतबार १ बजेका लागि बोलाइएको बैठक दिउँसो ३ बजेसम्मका लागि सरेको हो ।
सभामुख घिमिरेका प्रेस विज्ञ शेखर अधिकारीले शीर्ष नेताहरूबीच छलफल भइरहेको भन्दै सभामुखलाई बैठक सार्न अनुरोध गरिएको बताउनुभयो ।
उहाँका अनुसार प्रधानमन्त्रीको अनुरोधमा सभामुखले एक बजेका लागि तय गरेको बैठक दुई घन्टा पछि सार्नुभएको छ । टेलिफोन संवादमा सभामुखले तीन शीर्ष नेताबीचको छलफलले सदन खुलाउन सकारात्मक निष्कर्षका निकाल्न शुभकामना समेत दिनुभएको अधिकारीले बताउनुभयो ।
प्रधानमन्त्री प्रचण्डले आफूलाई प्रधानमन्त्री बनाउन सरदार प्रितम सिंह पटक–पटक दिल्ली गएको भनेर सार्वजनिक अभिव्यक्ति दिएपछि त्यसको विरोधमा एमालेले संघीय संसद्का दुवै सदन अवरुद्ध गर्दै आएको छ ।
प्रमुख प्रतिपक्षी एमालेले प्रधानमन्त्रीको राजीनामा मागेको छ भने रास्वपालगायतका दलहरूले प्रधानमन्त्रीबाट जवाफ आउनुपर्ने माग राखेका छन् ।
