काठमाडौँ । शुक्रबार दिउँसो ३ बजेका लागि बोलाइएको प्रतिनिधिसभाको बैठक बस्दै नबसी आइतबार १ बजेसम्मका लागि स्थगित भएको छ ।
केही दिनअघि आफूलाई प्रधामनमन्त्री बनाउन सरदार प्रीतम सिंह धेरै पटक दिल्ली गएको भन्ने प्रधानमन्त्री पुष्पकमल दाहाल प्रचण्डको अभिव्यक्तिलाई लिएर एमालेले बुधबारदेखि प्रतिनिधिसभा र राष्ट्रियसभाको बैठक चल्न दिएको छैन । एमालले प्रधानमन्त्रीको राजीनामा मागेको छ ।
एमालेले शुक्रबारको राष्ट्रियसभा बैठकमा अवरोध गरेको थियो । उसले प्रतिनिधिसभाको बैठक चल्न नदिने बताएको थियो । एमालेको उक्त अडानका कारण प्रतिनिधिसभाको बैठक अगाडि जान नसक्ने भएपछि सभामुखकै आग्रहमा प्रतिनिधिसभाको बैठक स्थगित गरिएको हो ।
सभामुखका प्रेस सल्लाहाकार शेखर अधिकारीले कार्यव्यवस्था परामर्श समितिको बैठकमा सभामुखले सत्तापक्ष र प्रमुख विपक्षीबीच घनिभूत छलफल गरेर भोलिसम्ममा सहमति गर्न आग्रह गर्नुभएको बताउनुभयो ।
संसद अवरुद्ध हुँदा मिटरब्याज सम्बन्धी विधेयक पास हुन नसक्नु राम्रो नभएको उल्लेख गर्दै सभामुख घिमिरेले दलहरुको ध्यानाकर्षण गराउनुभएको छ । अधिकारीका अनुसार सभामुखले भन्नुभएको छ, “तपाईंहरु एउटा निष्कर्षमा पुग्नैपर्छ । त्यसका लागि सहजीकरण गर्न म तयार छु । पर्सिसम्ममा सहमति गर्नुहोला ।”
