काठमाडौं । देशका विभिन्न क्षेत्रमा गए रातिदेखि भारी वर्षा भइरहेको छ । राति १२ बजेदेखि लुम्बिनी र गण्डकी प्रदेशका विभिन्न स्थानमा भारी वर्षा भएको छ ।
उक्त स्थान भई बहने स-साना खहरे खोलामा आकस्मिक बाढी आउनुका साथै होचा स्थानमा डुवान हुनसक्ने बाढी पूर्वानुमान महाशाखाले जनाएको छ । नदी तटीय क्षेत्रमा हुनेहरूले उच्च सतर्कता अपनाउन महाशाखाको आग्रह छ ।
तिनाउ नदीमा जलसतहले खतरा तह पार गरेको छ । महाशाखाका अनुसार तिनाउमा खतराको तहभन्दा ६.९०३ मिटरभन्दा माथि पानी पुगिसकेको छ ।
जल सतह बढ्दो क्रममा रहेको छ । तिनाउ नदीका तटीय क्षेत्र र आसपास डुबान हुनसक्ने होचा स्थानमा हुनेहरूलाई बिहान ९ बजेसम्म सुरक्षित स्थानमा रहन महाशाखाले अनुरोध गरेको छ ।
पछिल्लो २४ घण्टामा कुमालगाउँमा १३० मिमिमिटर वर्षा भएको छ भने कोइलाबासमा १३५.८ मिमिमिटर, खाँचीकोटमा १५३.४ मिमिमिटर, बल्ढ्यांगीमा २३८.४ मिलिमिटर, देउराली नवलमा १४५.६ मिलिमिटर वर्षा भएको छ । साथै खुडी बजारमा १२९.८ मिलिमिटर, तानसेनमा १२५.२ मिलिमिटर र जितपुरमा १६१.४ मिलिमिटर वर्षा भएको छ ।
