काठमाडौँ । ललिता निवास जग्गा प्रकरणमा संलग्न थप दुई जना पक्राउ परेका छन् । उक्त प्रकरणमा जोडिएका समरजंग कम्पनीका तत्कालीन अधिकृत रमेशकुमार पोखरेल र नक्कली मोही देवनारायण महर्जन पक्राउ परेका छन् ।
प्रहरीको केन्द्रीय अनुसन्धान ब्युरो (सीआईबी) ले ललिता निवासको जग्गा व्यक्तिको नाममा लैजान सरकारी कागज किर्ते गरेको कसूरमा गृह मन्त्रालयअन्तर्गतको समरजंग कम्पनीका तत्कालीन अधिकृत पोखरेल र पशुपति टिकिन्छा गुठी मार्फत् नक्कली मोही खडा गरिएका महर्जनलाई सोमाबार दिउँसो काठमाडौँबाट पक्राउ गरेको हो ।
ललिता निवास प्रकरणमा यो सँगै हालसम्म आठ जना पक्राउ परिसकेका छन् । अदालतको आदेशबाट पक्राउ परेका तीन जना भने छुटिसकेका छन् ।
समरजंग कम्पनीका नाममा रहेको जग्गालाई सरकारी कागज किर्ते गरेर टिकिन्छा गुठीमा लैजान तत्कालीन अधिकृत पोखरेलले कागजात तयार पारेका थिए ।
त्यसैगरी गुठीमार्फत् नक्कली मोही खडा गरिएका महर्जनले ६ लाख रुपैयाँ लिएर आफू नक्कली मोही बन्न तयार भएको सीआईबीले गरेको अनुसन्धानबाट थाहा भएको छ ।
तत्कालीन प्रधानमन्त्री बाबुराम भट्टराई नेतृत्वको मन्त्रिपरिषद् बैठकले २०६९ का विभिन्न मितिमा समरजंग कम्पनीको जग्गा टिकिन्छा गुठीमा लैजाने निर्णय गरेको थियो ।
सोही क्रममा नक्कली मोही खडा गर्ने गरी भूमिसुधार मन्त्रालयका तत्कालीन सचिव दिनेशहरि अधिकारीसहितका कर्मचारीले टिप्पणी उठाउनेदेखि मन्त्रिपरिषद्मा प्रस्ताव पेस गर्नेसम्मका काम गरेका थिए ।
