काठमाडौँ । भारतमा जारी १४ औं संस्करणको साफ च्याम्पियनसिप फुटबल अन्तर्गत सेमिफाइनलका खेलहरु आज शनिबार हुँदैछन् । पहिलो सेमिफाइनल अन्तर्गत कुवेत र बंगलादेशले प्रतिस्पर्धा गर्दैछन् ।
कुवेत र बंगलादेशबीचको खेल बैंगलोरस्थित श्री कान्तीरवा मैदानमा दिउँसो ३ः१५ बजे सुरु हुनेछ । दुवै टोली जित निकालेर फाइनलमा पुग्न चाहन्छन् । कुवेत समूह ए को विजेता बन्दै सेमिफाइनलमा स्थान बनाएको हो । यस्तै, समूह बी को उपविजेता बनेको बंगलादेशले कुवेतसँग भेट पक्का गरेको हो ।
यस्तै आज साँझ सेमिफाइनलकै अर्को खेलमा घरेलु टोली भारत र लेवनानले प्रतिस्पर्धा गर्दैछन् । यी दुई टोलीबीचको खेल साँझ ७ः४५ बजे सुरु हुनेछ । यो खेल पनि श्री कान्तीरवा मैदानमै हुनेछ । घरेलु समर्थकको साथ रहेको भारत लेवनानलाई हराउँदै उपाधिको नजिक पुग्न चाहन्छ । यता, लेवनान पनि भारतलाई स्तब्ध पार्दै फाइनलमा पुग्न चाहन्छ ।
जुन ८ मा भएको हिरो इन्टरनेशनल कपमा भारतले लेवनानलाई २–० गोलले पराजित गर्दै उपाधि जितेको थियो । तसर्थ भारतविरुद्ध लेवनानलाई बदला लिने अवसर रहेको छ ।
च्याम्पियनसिपमा नेपाल, आयोजक भारत, बंगलादेश, कुवेत, लेबनान, भुटान, पाकिस्तान, माल्दिभ्सले सहभागिता जनाएका थिए । कुवेत र लेवनानले आमन्त्रित टोलीको रुपमा सहभागिता जनाएका हुन् ।
