लुम्बिनी । संयुक्त राष्ट्रसङ्घका उपमहासचिव जिन–पियरे ल्याक्रोइक्सले आज बुद्धजन्मस्थल लुम्बिनी भ्रमण गर्नुभएको छ ।
लुम्बिनीमा उपमहासचिव ल्याक्रोइक्सलाई लुम्बिनी विकास कोषका उपाध्यक्ष भिक्षु मैत्तय (अवधेशकुमार त्रिपाठी)सहित कोषाध्यक्ष सिद्धिचरण भट्टराई, सदस्य सचिव सानुराजा शाक्य लगायतले स्वागत गर्नुभएको थियो । त्यस अवसरमा कोषका उपाध्यक्ष मैत्तयले लुम्बिनीको अवस्थाका बारेमा जानकारी गराउनुभएको थियो ।
राष्ट्रसङ्घको शान्ति सेनाका विभाग हेर्ने उपमहासचिवले बुद्ध जन्मस्थल लुम्बिनीको भ्रमण गर्न पाउँदा निकै खुसी लागेको र लुम्बिनीको विकासमा संयुक्त राष्ट्र सङ्घले सहकार्य गर्दै आएको बताउँदै आगामी दिनमा त्यसलाई निरन्तरता दिने बताउनुभएको विकास कोषका कोषाध्यक्ष भट्टराई जानकारी दिनुभयो ।
उपमहासचिव ल्याक्रोइक्सले मायादेवी मन्दिर, शान्ति दीप, थाई, कम्बोडियन फ्रान्स र भियतनाम गुम्बाको भ्रमण गर्नुभएको थियो । नेपालको चार दिवसीय भ्रमणका शिलशिलामा उपमहासचिव ल्याक्रोइक्स आज बुद्ध जन्मस्थल लुम्बिनी आउनुभएको हो ।
भ्रमणमा नेपाली सेनाको युद्ध कार्य विभागका विभागीय प्रमुख उपरथी ताराध्वज पाण्डे, रक्षा मन्त्रालयका सहसचिव बाबुराम अधिकारीसहित नेपाली सेनाका रथीको उपस्थिति रहेको थियो । रासस
फोटो -सागर पाण्डे
