काठमाडौँ । ललितपुर जिल्ला अदालतमा एक जना महिला कर्मचारीमाथि कुटपिट गर्ने कानुन व्यवसायी पक्राउ परेका छन् ।
बुधबार जिल्ला अदालतकी नायब सुब्बा प्रेमिका तामाङमाथि कुटपिट गर्ने काठमाडौं–१४ का ३६ वर्षीय अमिर लामिछानेलाई प्रहरीले पक्राउ गरेको हो ।
लामिछानेलेविरूद्ध पीडित तामाङले अभद्र व्यवहार मुद्दामा जाहेरी दिएपछि उनलाई बुधबार नै पक्राउ गरिएको जिल्ला प्रहरी परिसर ललितपुरका एसएसपी शिद्दिविक्रम शाहले जानकारी दिए।
मुद्दाको फाइल हेर्नेक्रममा सुरु भएको विवादमा लामिछानेले हातपात गरेको तामाङको दाबी छ। लामिछानेले मिसिल माग गरेका तर आफूले फोटोकपी दिने बताउँदा कुटपिट गरेको उनले बताइन्।
लामिछानेले गालीगलौज गर्दै मुक्का प्रहार गरेका उनले बताइन्। ‘ उहाँले मलाई मुक्काले नै हिर्काउनुभयो,’ उनले भनिन्,‘दुईटा दाँत हल्लिएको छ। मुखमा चोट लागेको छ। तान्दा कपडा च्यातिएको छ।’
उनीमाथि अभद्र व्यवहारमा अनुसन्धान भइरहेको प्रहरीले जनाएको छ। शुक्रबार जिल्ला प्रशासन कार्यालयमा पेश गरी उनीमाथि म्याद थप गर्ने तयारी रहेको प्रहरीले जनाएको छ।
