एजेन्सी । भारतको हरियाणाको चरखी दादरीमा बस्ने १०६ वर्षीया ‘उडनपरी दादी’ फेरि एकपटक चर्चामा छिन् । युवरानी महेन्द्र कुमारीको सम्झनामा सोमबारदेखि देहरादुनमा १८औँ राष्ट्रिय एथलेटिक्स च्याम्पियनसिप सुरु भएको छ ।
दुई दिने प्रतियोगितामा विभिन्न राज्यका ५ वर्षदेखि १०६ वर्षसम्मका ८ सयभन्दा बढी खेलाडीको सहभागिता रहेको छ ।
सोमबारको प्रतियोगिताको मुख्य आकर्षण हरियाणाको चरखी दादरी निवासी १०६ वर्षीया हजुरआमा रमाबाई थिइन् । उनले फेरि एक पटक आफ्नो आकर्षणले सबैलाई चकित पारिन् । उनले १००, २०० मिटर दौडमा सहभागी भएर स्वर्ण पदक जितिन् । उनले सटपुट इभेन्टमा आफ्नो दमदार प्रदर्शनले सबैलाई चकित पारिन् ।
बडोदरामा भएको राष्ट्रिय स्तरको एथलेटिक्स च्याम्पियनसिपमा रमाबाईले १०० मिटर दौडमा नयाँ विश्व कीर्तिमान बनाइन् । रमाबाईले १०० मिटर स्प्रिन्ट दौड ४५ः४० सेकेन्डमा पूरा गरेर नयाँ कीर्तिमान बनाएकी हुन् । यसअघि यो कीर्तिमान ७४ सेकेन्डमा दौड पूरा गर्ने मान कौरको नाममा थियो ।
चरखी दादरी जिल्लाको कदमा गाउँकी रमाबाईले राष्ट्रिय स्तरको एथलेटिक्स च्याम्पियनसिपमा आफ्ना ३ पुस्तासहित १००, २०० मिटर दौड, रिले दौड, लङ जम्पमा ४ स्वर्ण पदक जितेर इतिहास रचेकी छन् ।
यसअघि सन् २०२१ नोभेम्बरमा भएको प्रतियोगितामा उनले ४ स्वर्ण पदक जितिन् । रमाबाई गाउँकी सबैभन्दा जेठी महिला हुन् र सबैले उनलाई उडनपरी पड्डी (हजुरआमा) भनेर बोलाउँछन् । रमाबाईलाई सामान्यतया खेतमा र गाउँमा घरमा काम गरिरहेको देखिन्छ । उनी पूर्णतया स्वस्थ छिन् र यो उमेरमा पनि दैनिक ५ देखि ६ किलोमिटर दौडिन्छिन् ।
१ जनवरी १९१७ मा जन्मिएकी कदमा गाउँकी रमाबाई एक वृद्ध एथलेटिक्स खेलाडी हुन् । उनले नोभेम्बर, २०२१ मा वाराणसीमा आयोजित मास्टर्स एथलेटिक मीटमा भाग लिएकी थिइन् । १०५ वर्षको उमेरमा पनि बुढेसकालको पर्वाह नगरी खेलकुदलाई जीवनको हिस्सा बनाएर मिहिनेतका साथ अगाडि बढिरहेकी छिन् ।
बृद्ध खेलाडी रमाबाईले मैदानको कच्ची बाटोमा खेलकुद अभ्यास गर्छिन् । उनी बिहान ४ बजे उठेर दिनको सुरुवात गर्छिन् । नियमित रूपमा दौडने र हिंड्ने अभ्यास गर्छिन् । यसबाहेक उनी यो उमेरमा पनि ५–६ किलोमिटर दौडिन्छिन् ।
सामान्यतया, ८० वर्षको उमेरमा पुग्दा, अधिकांश मानिसहरूले खाट (ओछ्यान) समात्छन् । अर्थात् हिँड्न गाह्रो हुन्छ । तर, रमाबाईले भने १०५ वर्षको उमेरमा पनि खेलकुदमा सहभागी भई उदाहरण बसालिन् । उनी पूवा, दही खाने र दूध पनि धेरै पिउने गर्छिन् । रोटी वा पूवामा दैनिक २५० ग्राम घिउ र आधा केजी दही दैनिक उनको आहारमा समावेश गरिन्छ ।
कादमाकी रामबाईको पूरै परिवार खेलकुदमा नाम कमाइरहेको छ । उनकी ६२ वर्षीया छोरी सन्त्रादेवीले रिले दौडमा स्वर्ण पदक जितेकी छन् । रामबाईका छोरा ७० वर्षीय मुखत्यार सिंहले २०० मिटर दौडमा कास्य पदक जितेका छन् । छोरा वधु भटेरीले पनि रिले दौडमा स्वर्ण र २०० मिटर दौडमा कास्य पदक जितेर गाउँ र प्रदेशको नाम कमाएका छन् ।
