काठमाडौँ । पशुपतिनाथमा राखिएको सुनको जलहरी खरिद तथा प्रतिस्थापनमा अनियमितता नदेखिएको अख्तियार दुरुपयोग अनुसन्धान आयोगको प्रारम्भिक निष्कर्ष छ । यद्यपि जलहरीमा राखिएका सबै धातुको औसत तौल निकालेर अनुसन्धानलाई टुंग्याउन अझै दुई दिन लाग्ने बताइएको छ ।
अख्तियारका अनुसार जलहरीमा करिब एक सय ७ केजी अर्थात १०६ दशमलव ४३२५ किलो ग्राम सुन मापन भएको छ । त्यस्तै जलहरी कस्न बनाइएका काँटीको मापन साढे एक किलोग्राम रहेको छ ।
महालेखा परीक्षकको कार्यालयले जलहरीमा प्रयोग भएको सुनको मापन करिब ९७ केजी र करिब ११ केजीको रिङ भएको भन्दै पशुपति विकास कोषको लेखा परीक्षण प्रतिवेदन सार्वजनिक गरेको थियो ।
त्यसपछि जलहरीमा राखिएको सुन अपुग भएको दाबी गर्दै उजुरी परेको थियो । उजुरी परेसँगै अख्तियारले अनुसन्धान थालेको थियो । अख्तियारले पहिलो चरणमा कोषका पदाधिकारीसँग बयान लिएको भने सोमबार पशुपति परिसरमै नेपाली सेनाको रोहबरमा सुनको नापतौल लिइएको हो ।
यसअघि कोषका सदस्य सचिव मिलन थापाले संसदीय समितिमा रुँदै आफूहरूमाथि लगाइएको आरोप पुष्टि भए मृत्युदण्ड दिन माग गरेका थिए । उनले बदनाम गर्न आरोप लगाइएको भन्दै सेनाको रोहबरमा राखिएको जलहरीको सुनको नापतौल गर्न आग्रह गरेका थिए ।
उनले मुचुल्का उठाउने क्रममा भएको सङ्ख्यात्मक त्रुटिका कारण जलहरीको विषय विवादित बनेको स्वीकार गरे पनि सबै काम सेनाको कडा रेखदेखमा भएको बताएका थिए ।
राष्ट्र बैङ्कबाट दुई पटक गरी १०३ किलो ७९३ दशमलव १०० ग्राम सुन खरिद गरिएको बताएको थियो । सुरक्षाको जिम्मा सरकारले नै खटाएको विमानस्थलस्थित कालीदल गणले लिएको र सेनाकै रोहवरमा पशुपति क्षेत्रको रुद्रगारेश्वरस्थित ज्यासलमा राखिएर जलहरी बनाइएको थियो ।
जलहरी निर्माणका क्रममा तयार गरिएको मुचुल्का बमोजिम ९६ किलो ८२२ ग्राम सुनको जलहरी बनाएर चाँदीको जलहरीमाथि राखिएको र बाँकी रहेको १० किलो ९७६ ग्राम सुनमध्ये जलहरीको माथिल्लो भागको सुरक्षाका लागि रिङ, पेटी तथा सुनका किला बनाइएको हो ।
कोषले बाँकी रहेका टुक्राटाक्री सुन सेफमा राखिएको र सोको पनि नापतौल भएको जनाएको छ ।
