काठमाडौं । पर्यटनमन्त्री सुदन किरातीले नेकपा एसका सांसद प्रेम आलेलाई चेतावनीपूर्वक जवाफ दिदै बारुदको पहाडमा उभिएर सलाइ नखेलाउँदा राम्रो भनेका छन्।
विहिबार प्रतिनिधिसभाको बैठकमा पूर्वपर्यटनमन्त्री आलेले किरातीलाई ‘स्टन्ट मन्त्री’ को संज्ञा दिँदै भ्रष्टाचारी र चोरको संरक्षक बनेको आरोप लगाएपछि उनले सामाजिक सञ्जालमार्फत चेतावनीपूर्वक जवाफ फर्काएका हुन् । सदनमा बोल्दै आलेले अर्थमन्त्रालयको तार काट्ने मुसा पशुपतिनाथमा प्रवेश गरेको र त्यसलाई मन्त्री किरातीले संरक्षण दिएको आरोप लगाएका थिए ।
‘बारुदको पहाडमा उभिएर सलाइ नखेलाउँदा राम्रो । म धेरै कुरा जान्दिनँ, देश र जनताको लागि राम्रो काम गर्नु पर्छ भन्ने मात्र जान्दछु । पुर्खाले भन्थे आफ्नो शरीरमा हात्ती बोकेर अर्काको आङको जुम्रा नटिप्नू’, किरातीले फेसबुकमा लेखेका छन् ।
