काठमाडौँ । प्रतिनिधिसभाको बैठक आज बस्दैछ । सरकारले आगामी आर्थिक वर्ष २०८०/८१ का लागि प्रस्तुत गरेको नीति तथा कार्यक्रममाथिको छलफल आज पनि जारी रहने सम्भावित कार्यसूचीमा उल्लेख छ । शुक्रबार एमालेले संसद अवरुद्ध गरेपछि बस्न नसकेको बैठक आज बस्न लागेको हो ।
आजको बैठकमा नीति तथा कार्यक्रममाथिको छलफल जारी रहनेछ । साथै नीति तथा कार्यक्रममाथि संसदहरुले उठाउनुभएका प्रश्नको जवाफ प्रधानमन्त्री पुष्पकमल दाहालले दिने कार्यक्रम पनि छ ।
साथै नीति तथा कार्यक्रममा संशोधनका लागि दर्ता भएका प्रस्तावलाई निर्णयार्थ प्रस्तुत गरिनेछ । प्रतिनिधिसभामा नेपाली कांंग्रेसका तीनसहित २० जना सांसदले नीति तथा कार्यक्रम संशोधनको प्रस्ताव दर्ता गराउनुभएको छ ।
सरकारका तर्फबाट राष्ट्रपति रामचन्द्र पौडेलले यही जेठ ५ गते संसदको दुवै सदनको संयुक्त बैठकमा नीति तथा कार्यक्रम प्रस्तुत गर्नुभएको थियो । नीति तथा कार्यक्रम राष्ट्रियसभाबाट पारित भइसकेको छ ।
