काठमाडौं । नेकपा (एमाले) ले ढोरपाटन नगरपालिकाका मेयर देवकुमार नेपालीलाई पार्टी प्रदेश कमिटी सदस्यबाट निलम्बन गरेको छ । वचतकर्ताको रकम हिनामिना गरेको आरोप लागेपछि बागलुङको इमेज बचत तथा ऋण सहकारी संस्थाका संस्थापक अध्यक्ष नेपालीलाई एमालेले निलम्बन गरेको हो ।
एमालेका प्रदेश कमिटी सचिव धनञ्जय दवाडीले बुधबार एक विज्ञप्ति जारी गर्दै नेपालीलाई यो घटनाको निरुपण नहुँदासम्म निलम्बन गरिएको उल्लेख बताएका छन् । एमालेले छानबिनमा सहयोग पुर्याउन पनि नेपालीलाई आग्रह गरेको छ ।
“यस घटनामा आरोपित सहकारीका संस्थापक अध्यक्ष देवकुमार नेपाली र अन्य सबै सञ्चालकहरुलाई बचतकर्ताको सम्पूर्ण रकम शीघ्र फिर्ता गर्न तथा सरकारी निकायबाट अगाडि बढाइएका छानबिनको प्रक्रियामा सहयोग पुर्याउन हाम्रो पार्टी सम्बद्ध सबैलाई आग्रह गर्दछ”, विज्ञप्तिमा भनिएको छ ।
नेपालीसहित इमेज सहकारीका पदाधिकारी वचतकर्ताको रकम फिर्ता नगरेर हाल फरार रहेका छन् । गृह मन्त्रालयले संस्थापक अध्यक्ष नेपाली, कार्यवाहक अध्यक्ष डोरबहादुर परियार, सचिव सुनिल नेपाली, कोषाध्यक्ष लक्ष्मी सेन, सञ्चालक चित्रबहादुर भण्डारी, सदस्य रुपा विक र अर्का सदस्य झगबहादुर शाहीको यात्रा अनुमति रद्दसमेत गरेको छ ।
