काठमाडौं । आज मदन–आश्रित स्मृति दिवस । नेकपा एमालेका तत्कालीन महासचिव मदन भण्डारी र संगठन विभाग प्रमुख जीवराज आश्रितको २०५० साल जेठ–३ गते चितवनको दासढुंगामा जीप दुर्घटना भई निधन भएको थियो । त्यसैको सम्झनामा एमालेले हरेक वर्ष जेठ–३ गतेलाई मदन–आश्रित स्मृति दिवसको रुपमा मनाउँदै आएको छ ।
नेकपा एमालेका तत्कालीन महासचिव मदन भण्डारी र संगठन विभाग प्रमुख जीवराज आश्रितको निधन भएको आज ३० वर्ष पुगेको छ । कम्युनिष्टहरु नागरिकबाट चुनिएर सत्तामा पुग्नुपर्छ भन्ने मान्यताका पक्षपाती भण्डारीले जनताको बहुदलीय जनवादको विकास गरेका थिए । मदन भण्डारी र जीवराज आश्रितलाई आदर्श नेताका रुपमा चिनिन्छ ।
उक्त दुर्घटनाका साक्षी एवं जीप चालक अमर लामाको समेत हत्या भएपछि दुर्घटना अझै रहस्यमय बन्न पुगेको छ । रहस्यमय मानिने दुर्घटनाबारे अहिलेसम्म भएका छानविनले कुनै तथ्य निकाल्न सकेको छैन ।
दासढुंगा दुर्घटनापछि एमालेले पटक–पटक सरकारको नेतृत्व गरेको भए पनि घटनाको तथ्य बाहिर ल्याउन नसक्नुले पार्टीले आलोचना पनि खेप्नुपरेको छ ।
