काठमाडौँ । सरकारलाई आवश्यक आन्तरिक ऋण जुटाउन नेपाल राष्ट्र बैङ्कले १० अर्ब रुपियाँ बराबरको विकास ऋणपत्र निष्कासन गर्ने भएको छ ।
राष्ट्र बैङ्कले पाँच वर्ष अवधिको विकास ऋणपत्र २०८५ ‘ज’ बोलकबोल प्रक्रियाद्वारा निष्कासन गर्न लागेको हो । राष्ट्र बैङ्कले जेठ २ गते मङ्गलबार जारी गर्न लागेको विकास ऋणपत्रको बोलकबोल मङ्गलबार र निष्कासन बुधबार हुने जनाएको छ ।
पाँच वर्ष अवधिको विकास ऋणपत्र मङ्गलबार निष्कासन भएर परिपक्क हुने अवधि २०८५ जेठ ३ गते हुने राष्ट्र बैङ्कले जनाएको छ । यो ऋणपत्र बैङ्क तथा वित्तीय संस्था, गैरबैङ्क वित्तीय संस्था, बीमा कम्पनी, सङ्गठित संस्था र नेपाली नागरिकले खरिद गर्न सक्नेछन् ।
ऋणपत्रको ब्याजदर बोलकबोलबाट निर्धारण हुने राष्ट्र बैङ्कले जनाएको छ । ऋणपत्र लिन इच्छुकले जेठ २ गते मङ्गलबार दिउँसो ३ बजेसम्म बोलकबोलमार्फत आवेदन गर्न सक्नेछन् । आवेदन गर्दा न्यूनतम ५० हजार र बढीमा ५० हजारले भाग जाने गरी निष्कासित सबैका लागि आवेदन दिन सक्नेछन् ।
प्रतिस्पर्धी र अप्रतिस्पर्धी बोलवालालार्ई निष्कासित रकमको आठ अर्ब पाँच करोड (८५ प्रतिशत) र एक अर्ब पाँच करोड (१५ प्रतिशत) छुट्याइएको राष्ट्र बैङ्कले जनाएको छ । खरिद गरिएको उक्त ऋणपत्र धितो राखेर बैङ्क तथा फाइनान्स कम्पनीबाट कर्जा लिन र दिनसमेत पाइनुका साथै दोस्रो बजार कारोबार नेपाल स्टक एक्सचेन्जमार्फत हुने राष्ट्र बैङ्कले जनाएको छ ।
