एजेन्सी । भारतीय क्रिकेट टोलीका विकेटकिपर एवं ब्याट्सम्यान तथा लखनउ सुपर जायन्ट्सका कप्तान लोकेश राहुल (के एल राहुल)ले आईपीएल २०२३ र विश्व टेस्ट च्याम्पियनसिपको फाइनलका बाँकी खेलहरूबाट आफू बाहिरिएको घोषणा गरेका छन् ।
उनले इन्स्टाग्राममा एक भावुक पोस्ट गर्दै यो जानकारी दिएका हुन् । लखनउविरुद्धको खेलमा फिल्डिङ गर्ने क्रममा राहुल घाइते भएका थिए । यसपछि उनी अन्तिम स्थानमा ब्याटिङ गर्न आए र रन बनाउन सकेनन् । अब उनी करिब दुई महिनासम्म क्रिकेटबाट टाढा हुनेछन् ।
राहुलको आइपिएलबाट बाहिरिने निर्णय पहिले नै भइसकेको थियो तर अब उनले टेस्ट च्याम्पियनसिपको फाइनल पनि नखेल्ने जानकारी दिएका छन् ।
केएल राहुलले इन्स्टाग्राममा आफ्नो तस्विर सेयर गरेका छन् । यसमा लखनऊ सुपर जायन्ट्सका उनका साथीहरूले उनलाई मैदानबाट बाहिर निकालिरहेका छन् । राहुलले इन्स्टाग्राममा लेखेका छन्, ‘चिकित्सक टोलीसँग राम्ररी विचार र परामर्शपछि म चाँडै तिघ्राको शल्यक्रिया गराउँदैछु भन्ने निष्कर्षमा पुगेको छु । मेरो ध्यान आगामी हप्ताहरूमा मेरो पुनर्वास र रिकभरीमा हुनेछ । यो एक कठिन निर्णय भएको छ, तर मलाई थाहा छ यो ठिक हुनका लागि सही कुरा हो ।’
राहुलले थप लेखेका छन्, ‘टिमको कप्तानको हैसियतले यो निर्णायक समयमा त्यहाँ नआएकोमा म गहिरो दुःखी छु, तर म विश्वस्त छु कि साथी खेलाडीहरूले सधैं झैं आफ्नो उत्कृष्ट प्रदर्शन गर्नेछन् । म टोलीको हरेक खेल हेर्छु र प्रोत्साहन गर्नेछु ।’
राहुलले आगामी विश्व टेस्ट च्याम्पियनसिपको फाइनलबाट पनि आफूलाई बाहिर राखेका छन् । उनले लेखेका छन्, ‘आगामी महिना टीम इन्डियासँग ओभलमा नहुनेमा निराश छु । म टिममा फर्कन र मेरो देशको लागि खेल्न सबै गर्नेछु । यो सधैं मेरो प्राथमिकता हो ।’
