काठमाडौं । हालै सम्पन्न एसिसी प्रिमियर कपको उपाधि नेपालले पायो । मंगलबार भएको फाइनलमा युएईलाई ७ विकेटले हराउँदै नेपालले एसिया कपमा स्थान बनायो । यससँगै नेपालले एसिया कपमा भारत र पाकिस्तानसँग खेल्न पाउनेछ ।
१० टोलीको सहभागीता रहेको प्रतियोगितालाई दुई समूहमा विभाजन गरिएको थियो । जसअन्तर्गत समूह ए बाट नेपाल विजेता र ओमान उपविजेताको रुपमा सेमिफाइनलमा पुगेका थिए । समूह बी बाट पनि युएई विजेता र कुवेत उपविजेता हुँदै सेमिफाइनलमा स्थान बनाएका थिए ।
नेपाल र कुवेतबीचको सेमिफाइनल भारी वर्षाको कारण रद्द भएर नेपाल समूह विजेताको रुपमा फाइनलमा पुगेको थियो भने युएईओमानलाई डिएलएस मेथर्डमा दुई रनले हराउँदै फाइनलमा स्थान पक्का गरेको थियो ।
घरेलु मैदान टियु र मुलपानीमा भएको यस प्रतियोगितामा ९ शतक प्रहार भए । जसमा सर्वाधिक धेरै युएईबाट चार, हङकङबाट दुई, नेपाल, साउदी अरेविया र ओमानबाट समान एक एक शतक प्रहार भएका थिए ।
टियु क्रिकेट मैदानमा ६ शतक बनेका थिए भने पहिलो पटक अन्तर्राष्ट्रिय क्रिकेट प्रतियोगिता आयोजना भएको मुलपानीमा तीन प्रहार भए । मुलपानीमा ओमानका ओपनर जतिन्दर सिंहले मलेसियाविरुद्ध १ सय १०, हङकङका बाबर हायतले सिंगापुरविरुद्ध १ सय ८ र युएईविरुद्ध अंशुमन रथले १ सय ६ रनको शतकीय इनिङ खेलेका थिए ।
यस प्रतियोगितामा सर्वाधिक ठूलो योगफल युएईले बनाएको थियो । युएईले टियुमा सिंगापुरविरुद्ध ४ सय ७१ रन बनाएको थियो । यस्तै, सबैभन्दा कम योगफल कतारले बनाएको छ । समुह चरणको अन्तिम खेलमा कतार नेपालविरुद्ध ८९ रनमा अल आउट भएको थियो । यसै प्रतियोगिताको एकै इनिङमा युएईका वृत्य अरविन्दले कुवेतविरुद्ध १ सय ८५ रन बनाएका थिए ।
एसिसी प्रिमियर कपमा सर्वाधिक रन बनाउने पाँच ब्याटरमा नेपालका एकमात्रै खेलाडी अटाएका छन् । यस प्रतियोगितामा सर्वाधिक रन बनाउने पाँच खेलाडी र उनीहरुको प्रदर्शन यस प्रकार छ :
१) वृत्य अरविन्द (युएई) – ४ सय ५४ रन
एसिसी प्रिमियर कपमा युएईका युवा विकेटकिपर वृत्य अरविन्दले सर्वाधिक रन बनाए । उनले ६ खेलमा २ शतक र १ अर्धशतकसहित कुल ४ सय ५४ रन बनाएका छन् । उनले ६ खेलमा ४२ चौका र १८ छक्का प्रहार गरेका छन् ।
वृत्यले कुवेतविरुद्ध १७ चौका र ९ छक्कासहित १ सय ८५ रनको सानदार शतकीय इनिङ खेलेका थिए । यस्तै, उनले सिंगापुरविरुद्ध १७ चौका र ७ छक्कासहित १ सय ७४ रन बनाएका थिए ।
बहराइनविरुद्ध ८४ बलमा ६२ रन बनाएका फाइनलमा नेपालविरुद्ध भने ८ रनमा आउट हुन पुगेका थिए । यससँगै उनी यस प्रतियोगिताका उत्कृष्ट ब्याटर पनि चुनिए ।
२) जतिन्दर सिंह (ओमान) – २ सय ८८ रन
यस प्रतियोगितामा ओमानका ओपनर जतिन्दर सिंह कुल २ सय ८८ रनका साथ दोस्रो स्थानमा रहे । उनले ६ खेलमा १ शतक र १ अर्धशतक प्रहार गरे । उनले प्रतियोगिताभर ३७ चौका र ४ छक्का हानेका थिए ।
नेपालसँग १५ रनमा आउट भए जतिन्दरले मलेसियाविरुद्ध १ सय ११ बलमा १२ चौका र १ छक्कासहित १ सय १ रनको शतकीय इनिङ खेलेका थिए । यस्तै, उनले साउदीविरुद्ध ८८ रन बनाएका थिए भने सेमिफाइनल खेलमा युएईविरुद्ध ४२ रन बनाएका थिए । कुवेतविरुद्ध तेस्रो स्थानको लागि भएको खेलमा जतिन्दरले २६ रन बनाएका थिए ।
३)अब्दुल वहिद (साउदी) – २ सय ५५ रन
साउदी अरेवियाका अब्दुल वहिदले यस प्रतियोगितामा कुल २ सय ५५ रन बनाएका छन् । उनले ३ खेलमा १ शतक र १ अर्धशतक बनाए । जसमा उनले ३७ चौका र २ छक्का प्रहार गरेका थिए ।
कतारलाई ७ विकेटले हराउदा अब्दुलले १ सय २४ रनको शतकिय ईनिङ खेलेका थिए । उनी अन्तिम खेलमा ओमानविरुद्ध ८६ बलमा ९५ रनमा आउट भएपछि शतक हान्नबाट चुकेका थिए ।
४) कुशल मल्ल (नेपाल) – २ सय ३८ रन
कुशल मल्ल शीर्ष पाँचमा पर्ने एकमात्रै नेपाली ब्याटर हुन् । उनले ५ खेलमा १ शतक र २ अर्धशतकसहित २ सय ३८ रन बनाएका छन् । उनले प्रतियोगिताभर १८ चौका र १९ छक्का प्रहार गरे।
कुशलले साउदीविरुद्धको पहिलो खेलमा ४० बलमा ५ चौका र ५ छक्कासहित ७० रनको अविजित इनिङ खेलेका थिए । दोस्रो खेलमा ओमानविरुद्ध ६४ बलमा ९ चौका र १० छक्कासहित १ सय ८ रनको शतकिय ईनिङ खेलेका थिए । यी दुबै खेलमा कुशल प्लेयर अफ द म्याच भएका थिए ।
कुवेतसँग ५७ रन बनाउदा उनी कतारसँग ३ रनमा आउट भएका थिए ।
५) मोहम्मद वासिम (युएई) – २ सय ३६ रन
युएईका कप्तान मोहम्मद वासिम प्रिमियर कपमा २ सय ३६ रन बनाउदै शीर्ष पाँचमा रहे । वासिमले ६ खेलमा १ शतक बनाए। उनले १६ चौका र २२ छक्का हानेका छन् ।
वासिमले विष्फोटक ब्याटिङ गर्दै सिंगापुरविरुद्ध ८२ बलमा ९ चौका र १६ छक्कासहित १ सय ६० रन बनाएका थिए। त्यस खेल बाहेक अन्यमा भने उनले राम्रो गर्न सकेनन्। उनी ओमानसँग ४८, बहराइन १, हङकङ र कुवेतविरुद्ध समान ८ रनमा आउट हुँदा फाइनलमा नेपालविरुद्ध ११ रनमा आउट भएका थिए ।
