काठमाडौँ । काठमाडौँमा जारी एसिसी मेन्स प्रिमियर कपको फाइनलको बाँकी खेल आज हुँदैछ । हिजो वर्षाका कारण खेल रोकिएपछि आज सोही खेललाई निरन्तरता दिइनेछ । आज विहान ९ बजेदेखि हिजो रोकिएको ओभरबाट खेल सुरु हुनेछ ।
नेपाल क्रिकेट संघ (क्यान)ले आजको खेलमा दर्शकलाई निःशुल्क प्रवेश दिने भएको छ । हिजो भने टिकटको मूल्य प्रतिव्यक्ति दुई सय राखिएको थियो । हिजो टस हारेर पहिले ब्याटिङ गरेको यूएईले २७.३ ओभरमा ९ विकेट गुमाउँदै १०६ रन बनाएपछि वर्षाले खेल स्थगित भएको थियो ।
नेपालका लागि ललित राजवंशीले हिजोको खेलमा अन्तिम दुई बलमा दुई विकेट लिएपछि आज उनी ह्याट्रिक लिने उद्देश्यका साथ मैदानमा उत्रने छन् । आज पनि वर्षाको उत्तिकै सम्भावना छ । यदी आज पनि वर्षाका कारण खेल हुन सकेन भने नतिजा सुपर ओभरका आधारमा निकालिनेछ । वर्षाका कारण सुपर ओभर पनि सम्भव नभएमा नेपाल ओडीआई बरियताका आधारमा स्वतः एसिया कपका लागि छनोट हुनेछ । ओडीआई बरियतामा नेपाल १४औँ र यूएई १९औँ स्थानमा छन् ।
