जनकपुरधाम । नेकपा (एकीकृत समाजवादी) का अध्यक्ष माधवकुमार नेपालले लडाकुलाई रकम दिनेबारे प्रधानमन्त्रीले सत्ता गठबन्धनमा रहेका दलहरूलाई प्रष्ट पार्नुपर्ने बताएका छन् ।
शुक्रबार जनकपुरधाममा आयोजित पत्रकार सम्मेलनमा उहाँले लडाकुलाई रकम दिनेबारे आफूले प्रधानमन्त्रीसँग जिज्ञासा राखेको बताउनुभयो । “लडाकु वा अरु कोही पीडितलाई रकम दिँदै जाने तरिका पनि ठिक होइन, मैले यो कुरा प्रधानमन्त्रीजीलाई भनेको थिएँ । उहाँले नयाँ रकम हामीले दिएको छैन भन्नुभयो”, अध्यक्ष नेपालले भन्नुभयो ।
उहाँका अनुसार पैसा बाँड्दै हिंड्ने अभ्यासले मुलुकमा राम्रो परिपाटी राम्रो हुँदैन । उहाँले मुलुकको आर्थिक अवस्था राम्रो नभएको बेला यसरी पैसा बाँड्दै हिँड्दा राम्रो भए पनि परिपाटी राम्रो नहुने बताउनुभयो । “के भएको हो भन्ने बारेमा प्रधानमन्त्रीले घटक दलहरूबीचमा प्रष्ट पार्नुपर्ने आवश्यकता छ”, उहाँले भन्नुभयो ।
आफूलाई प्रधानमन्त्री पुष्पकमल दाहाल प्रचण्डले लडाकुलाई रकम दिने पुरानै निर्णय भएको बताएको अध्यक्ष नेपालले जानकारी दिनुभयो । प्रधानमन्त्री प्रचण्डको भनाइ उद्धृत गर्दै उहाँले भन्नुभयो, “मैले नयाँ निर्णय गरेको होइन, पुरानै निर्णय हो, नयाँ रकम होइन, पहिले दिन बाँकी रकम दिइएको हो ।”
