काठमाडौँ। राज्यले नै आफूहरूको आन्दोलन भड्काउने र उत्तेजित पार्ने काम गरेको आरोप मिटरब्याज तथा ठगीविरुद्ध किसान–मजदुर सङ्घर्ष समितिले लगाएको छ ।
सङ्घर्ष समितिका अध्यक्ष अवधेश कुशवाहाले मंगलबार एक विज्ञप्ति जारी गर्दै आफूहरूको आन्दोलनभित्र छिरेर प्रहरीले ज्येष्ठ नागरिक, अशक्त तथा बिरामीमाथि कुटपिट गरेको आरोप लगाउनुभएको छ । साथै उहाँले महिलामाथि पुरुष प्रहरीले आक्रमण तथा दुर्व्यवहार गरेकोसमेत बताउनुभएको छ ।
उहाँका अनुसार पीडितले सहयोगी तथा शुभचिन्तकबाट सहयोग जुटाएर जम्मा गरेको अनाज, ग्यास, ग्यास चुलो, स्पिकर र भाँडाकुँडासमेत प्रहरीले लुटेको छ ।
विज्ञप्तिमा भनिएको छ, “यस्तो राज्य प्रायोजित आतङ्क र दमनको हामी घोर भर्त्सना गर्दछौँ ।” संघर्ष समितिका अध्यक्ष कुशवाहाले गृहमन्त्री नै आफूहरूको आन्दोलन दबाउन उद्यत रहेको आरोप लगाउँदै सङ्घर्ष समितिले चाँडै प्रतिवादमा आन्दोलनको नयाँ कार्यक्रम घोषणा गर्ने जानकारी दिनुभएको छ ।
उहाँले सोमबार शान्ति वाटिकाबाट सिंहदरबारसम्म आफूहरूको शान्तिपूर्ण जुलुस जाने कार्यक्रम रहेकोमा बिहानैदेखि प्रहरीले शान्तिवाटिका क्षेत्र पूर्णरुपमा नियन्त्रणमा लिँदै पीडितहरुलाई आवतजावतमै निषेध र धरपकड गरिएको बताउनुभयो ।
