काठमाडौँ । प्रधानमन्त्री शेरबहादुर देउवाले सभामुख अग्निप्रसाद सापकोटालाई टेलिफोन गरी भोलि बस्ने प्रतिनिधिसभाको बैठकलाई सुचारु गर्न आग्रह गर्नुभएको छ । प्रतिनिधिसभाको बैठक भोलि बुधबारका लागि बोलाइएको छ ।
आज बसेको कांग्रेस संसदीय दलको बैठकको बीचमै प्रधानमन्त्री देउवाले सभामुख सापकोटालाई फोन गरी बुधबार बोलाइएको प्रतिनिधिसभाको बैठक सञ्चालन गर्ने वातावरण बनाउन आग्रह गर्नुभएको थियो । बुधबार बोलाइएको संसद्को बैठक बस्ने वा नबस्ने टुङ्गो नभएपछि प्रधानमन्त्री देउवाले टेलिफोन गरी त्यस्तो आग्रह गर्नुभएको हो ।
भोलि बस्ने प्रतिनिधिसभाको बैठकमा एमसीसी टेबुल हुने सम्भवाना रहेको बताइएको छ । संसदीय दलको बैठकमा अधिकांश सांसदहरु अमेरिकी सहयोग परियोजना एमसीसीको पक्षमा उभिएको बताइएको छ । उनीहरुले संसद्बाट एमसीसी पारित गर्नुपर्ने सुझाव दिएका थिए ।
