काठमाडौँ । राप्रपा नेपालका अध्यक्ष कमल थापाले पहिचानको आधार विस्तारै खस्कँदै गएको बताउनुभएको छ ।
सामाजिक सञ्जालमार्फत उहाँले किराँत वा लिम्बू पहिचानको आधार मुन्धुम, किराँत धर्म, संस्कृति र परम्परा हो भन्दै किराँती नेता र संस्थाहरुले खोजिरहेको पहिचानको आधार खस्किँदै गएको बताउनुभएको हो ।
कोशी प्रदेश नामकरणको विरोधमा केही किराँती नेता र संस्थाहरुले चलाइरहनुभएको आन्दोलनप्रति आफ्नो कुनै टिप्पणी नभएको र त्यो उहाँहरुको संविधान प्रदत्त अधिकार हो भन्दै अध्यक्ष थापाले उहाँहरुलाई पहिचानको आधार विस्तारै खस्किँदै गएकोबारे समेत जानकारी वा चेतना राखिदिन आग्रह गर्नुभयो ।
विगत केही वर्षयता भइरहेको योजनाबद्ध र संगठित धर्मपरिवर्तनको डढेलोको सबैभन्दा बढी नकारात्मक प्रभाव किराँत समुदायमा परेको उहाँको भनाइ छ।
उहाँका अनुसार २०६८ को जनगणनामा कुल जनसंख्याको ३ प्रतिशत रहेको नेपालको तेस्रो किराँत धार्मिक समुदाय पछिल्लो जनगणना अनुसार करिब १.५ प्रतिशतमा खुम्चेको र पाँचौँ स्थानमा झरेको अनुमान गरिएको छ। हिन्दू र बुद्धिष्टहरुको संख्या पनि निकै घटेको छ।
“यस्तो संवेदनशील विषयमा दल, संसद्, सरकार र धार्मिक सांस्कृतिक संस्थाहरुको गम्भीर ध्यान गएको देखिन्न। किराँत धर्म संस्कृति र किराँत/लिम्बुहरुको पहिचान नै सकिएपछि प्रदेशको नामकरणको अर्थ नै के रहन्छ र १ यसबरे ध्यान दिन सम्बद्ध सबैसँग आग्रह गर्दछु”, उहाँले भन्नुभएको छ ।
