एजेन्सी । कोलकाता नाइट राइडर्स (केकेआर)का ब्याट्सम्यान रिंकु सिंहले गुजरात जाइन्ट्स (जीटी) विरुद्धको खेलपछि बलर यश दयाललाई टेक्स्ट म्यासेज गरेर प्रोत्साहन गरेको खुलासा गरेका छन् । यश दयाल ती बलर हुन् जसको ओभरको अन्तिम ५ बलमा रिंकुले ५ छक्का प्रहार गर्दै आइतबार कोलकातालाई ३ विकेटले जित दिलाएका थिए ।
इन्डिया टुडेलाई दिएको अन्तर्वार्तामा रिंकुले भने, ‘मैले खेलपछि यशलाई म्यासेज गरेर क्रिकेटमा यस्तो हुने गरेको बताएँ । तिमी यी सबै बिर्सनु र आफ्नो बलिङमा ध्यान दिनु । तिमीले गत वर्ष साँच्चै राम्रो प्रदर्शन गरेका थियौ ।’
यस खेलमा पहिले ब्याटिङ गर्दै गुजरातले ४ विकेट गुमाएर २०४ रन बनाएको थियो । यस खेलमा एक विन्दुमा कोलकाताले खेलमा कब्जा जमाएको थियो तर गुजरातका कप्तान राशिद खानले १७ औं ओभरको पहिलो ३ बलमा ह्याट्रिक लिएपछि खेल गुजराततर्फको पक्षमा मोडियो ।
राशिदले ओभरको पहिलो बलमा रसेललाई आउट गरेका थिए । त्यसपछि दोस्रो बलमा सुनिल नारायण र तेस्रो बलमा शार्दुललाई एलबीडब्लु गर्दै ह्याट्रिक पूरा गरे । यो ओभरपछि कोलकाताको स्कोर १५७/७ थियो । कोलकातालाई १८ बलमा ४८ रन आवश्यक थियो । अन्तिम ओभरमा कोलकातालाई जितका लागि २९ रन आवश्यक थियो ।
गुजरातका लागि यश दयाल बलिङ गर्दै थिए । उमेश यादवले पहिलो बलमा एक रन लिए । त्यसपछि अन्तिम ५ बलमा २८ रन आवश्यक थियो । रिंकु १६ बलमा १८ रनमा खेल्दै थिए । उनले ओभरको बाँकी ५ बलमा लङ अफ, स्क्वायर लेग र लङ अनतर्फ ५ छक्का प्रहार गरी आफ्नो टोलीलाई ३ विकेटले अविश्वसनीय जित दिलाए ।
यसअघि केकेआरले पनि खेलपछि यशलाई उत्प्रेरित गर्न ट्वीट गरेको थियो । केकेआरले लेखेको छ, ‘कुनै समस्या छैन यश । आज काममा बस एक कठिन दिन थियो । क्रिकेटका उत्कृष्ट खेलाडीमा पनि यस्तो हुन्छ । यश दयाल तिमी च्याम्पियन हौ, तिमी बलियो भएर फर्कने छौ ।’
