एजेन्सी । भारतीय क्रिकेट कन्ट्रोल बोर्ड (बीसीसीआई)ले यस पटकको आईपीएलमा खेलाडीहरूको फिटनेसलाई जीपीएस उपकरणको सहायताले अनुगमन गर्ने भएको छ ।
सबै खेलाडीहरूले यसलाई अभ्यास र खेलको समयमा लगाउनु पर्नेछ । यो यन्त्रले खेलाडीको फिटनेससँग सम्बन्धित करिब ५०० प्रकारको जानकारी दिनेछ । यी जानकारीहरूमा खेलाडीको ऊर्जा स्तर, कभर गरिएको दूरी, गति, ब्रेकडाउनको जोखिम, मुटुको चाल, रक्तचाप आदि समावेश छन् । यो यन्त्रले खेल दौरान बढी बोझ पर्दा खेलाडीलाई चोट पुग्न सक्ने सीमा पनि पत्ता लगाउनेछ ।
बीसीसीआई स्रोतको विश्वास गर्ने हो भने ‘वर्कलोड डिभाइस’मा सन् २०१८ देखि काम चलिरहेको थियो । बीसीसीआईले २०१८ मा नै यस्तो उपकरण प्रयोग गर्न ग्रिन सिग्नल दिएको थियो । यो पहिलो पटक यसै आईपीएलमा प्रयोग गरिँदैछ । यो उपकरण वुमन्स प्रिमियर लिग (डब्लुपीएल) मा प्रयोग गरी हेरिएको थियो ।
यसबाट निकै राम्रो नतिजा आयो । जसअनुसार फ्रेन्चाइजीहरूलाई पनि फाइदा भयो र उनीहरूले आफ्ना महत्त्वपूर्ण खेलाडीहरूलाई आवश्यकता अनुसार प्रयोग गरे । यसपछि यसलाई आईपीएलमा प्रयोग गर्न ‘ग्रीन सिग्नल’ दिइएको छ ।
वर्कलोड मोनिटरिङ उपकरण इङ्ल्यान्ड र अष्ट्रेलियाली क्रिकेट टोलीले पनि प्रयोग गरिरहेका छन् । भारतमा, यो देशको राष्ट्रिय हक्की टोलीका खेलाडीहरूले पनि प्रयोग गर्छन् ।
आईपीएलमा भारतीय खेलाडीको फिटनेस अनुगमनका लागि तीन महिनाअघि बीसीसीआईको साधारणसभाले कार्यभार व्यवस्थापन गर्ने निर्णय गरेको थियो ।
आईपीएल सकिए लगत्तै भारतीय टोलीले अष्ट्रेलियाविरुद्ध इङ्ल्यान्डमा हुने विश्व टेस्ट च्याम्पियनसिपको फाइनल खेल्नुपर्नेछ । साथै, एकदिवसीय विश्वकप अक्टोबर–नोभेम्बरमा भारतमा हुँदैछ । यस्तो अवस्थामा सिनियर र महत्वपूर्ण खेलाडीलाई चोटपटक लाग्न नदिन फ्रेन्चाइजीसँग वर्कलोड मोनिटरिङ उपकरण प्रयोग गर्ने निर्णय भएको हो ।
आईपीएलमा वर्कलोड मोनिटरिङ यन्त्र प्रयोग गर्नुको सबैभन्दा ठूलो कारण भनेको विश्व टेस्ट च्याम्पियनसिप अघि आफ्ना महत्त्वपूर्ण खेलाडीहरू विशेष गरी पेसरहरूलाई सुरक्षित राख्नु हो । टीम इण्डिया अहिले आफ्ना प्रमुख खेलाडीको चोटबाट संघर्ष गरिरहेको छ ।
जसप्रित बुमराह चोटका कारण गत वर्ष टी–२० विश्वकप र एसिया कप खेल्न सकेनन् । योसँगै श्रेयस अय्यर पनि ढाडको चोटका कारण आईपीएलबाट बाहिर छन् । बुमराहलाई विश्व टेस्ट च्याम्पियनसिपको फाइनल खेल्न गाह्रो छ । यससँगै अय्यर विश्व टेस्ट च्याम्पियनसिपअघि फिट हुने सम्भावना पनि कम छ । यस्तो अवस्थामा भारतीय क्रिकेट व्यवस्थापन कुनै जोखिम लिन चाहँदैन ।
