एजेन्सी । भोजपुरी अभिनेत्री आकांक्षा दुबेले बनारसको एक होटलमा आत्महत्या गरेकी छन् ।
शनिबार राति सुटिङ सकेर नायिकाले होटलमा गएर आत्महत्या गरेकी हुन् । उनको शव होटलको कोठाको पंखामा झुण्डिएको अवस्थामा फेला परेको थियो ।
सूचना पाएपछि सारनाथ प्रहरीले शवलाई आफ्नो नियन्त्रणमा लिएको छ । हालसम्म आत्महत्याको कारण खुल्न सकेको छैन । आकांक्षाको जन्म उत्तर प्रदेशको मिर्जापुरमा २१ अक्टोबर १९९७ मा भएको थियो । उनलाई सानैदेखि नृत्य र अभिनयमा रुचि थियो । उनी प्रायः सामाजिक सञ्जालमा डान्सको भिडियो पोस्ट गर्ने गर्थिन् ।
आकांक्षा शनिबार राति सारनाथ थाना क्षेत्रको सोमेन्द्र होटलमा बसेकी थिइन् र बिहान उनको शव झुण्डिएको अवस्थामा फेला परेको थियो । हतारमा होटलका कर्मचारीले सारनाथ प्रहरीलाई खबर गरेका थिए ।
त्यसपछि आफन्तलाई पनि घटनाबारे जानकारी गराइएको थियो । प्रहरीले अभिनेत्रीको मोबाइल र अन्य सामान कब्जामा लिएर अनुसन्धान सुरु गरेका छन् । साथै उनको नम्बरको कल डिटेल पनि निकाल्ने काम भइरहेको छ ।
आकांक्षा दुबे भोजपुरीकी चर्चित अभिनेत्री थिइन् । उनले सन् २०१९ मा फिल्म ‘मेरी जंग मेरा फैसला’ बाट डेब्यू गरेकी थिइन् । उनले यो फिल्ममा केमियो गरे पनि सानो भूमिकामा दर्शकलाई निकै प्रभावित पारे । त्यसपछि उनले भोजपुरी फिल्म ‘मुझसे शादी करोगी’ र ‘साजन’ जस्ता फिल्महरू गरिन् जुन निकै हिट भयो ।
