काठमाडौँ । नेपाली कांग्रेसका सांसद रामहरि खतिवडाले सडक दुर्घटनाका घाइतेहरुको निःशुल्क उपचारको व्यवस्था मिलाउन माग गरेका छन् ।
आइतबारको प्रतिनिधिसभा बैठकमा बोल्दै उनले थोत्रा बस र बीमा नहुँदाको अवस्थामा घाइतको बिचल्ली हुने गरेको भन्दै सरकारको ध्यानाकर्षण गराएका हुन् ।
राज्यले पहुँचवालाका नाममा उपचारका लागि करोडौँ खर्च दिने गरेको तर दूरदराजका बिरामीले उपचारको लागि घरबार बेच्दा पनि उपचार हुन नसक्ने अवस्था रहेको खतिवडाले बताए ।
उनले भने ‘बस पुराना छन् । बीमाको व्यवस्था छैन । बस धनी पनि सम्पर्कमा आउँदैनन् । वीर, शिक्षण अस्पतालमा उपचार गर्न पैसा नपाएर छटपटिनुपर्ने अवस्था छ यसर्थ बसमा चढ्नेलाई बिमाको अनिवार्य व्यवस्था गरियोस् ।’
यस्तै, खतिवडाले निःशुल्क नागरिकको शिक्षा, स्वास्थ्य उपचारको सहज रुपमा व्यवस्था गर्न पनि आग्रह गरे ।
