काठमाडौँ । काठमाडौँ महानगरपालिकाले महानगरबासीलाई एकै स्थानबाट सेवा प्रदान गर्ने उद्देश्यले काठमाडौँ प्लाजा भाडामा लिएको छ ।
काठमाडौँ प्लाजा भाडामा लिन महानगरले नेपाल ट्रष्टसँग सम्झौता गरेको छ। सहमतिपत्रमा महानगरका प्रमुख प्रशासकीय अधिकृत बसन्त अधिकारी र ट्रष्टका सहसचिव विष्णुप्रसाद ढकालले हस्ताक्षर गर्नुभएको छ । सम्झौताअनुसार प्रत्येक पाँच वर्षमा १० प्रतिशतले भाडा वृद्धि हुनेगरी महानगरले १० वर्षका लागि काठमाडौँ प्लाजा भाडामा लिएको हो ।
छरिएर बसेका सबै संरचना र सेवालाई एउटै ठाउँमा ल्याएर सेवा प्रवाहलाई व्यवस्थित गर्ने उद्देश्यले महानगरले प्लाजा भाडामा लिएको हो। महानगरमा हाल १६ विभाग छन् र ती सबै विभागले हाल १० स्थानबाट सेवा प्रवाह गरिरहेका छन्।
करिब ५ रोपनी २ पैसा क्षेत्रफलमा निर्माण भएको ७ तले भवनमा अब महानगरको सबै कार्यलयहरू एकै ठाउँमा हुनेछ। २०७२ को भूकम्पअघि महानगरले एकै स्थानबाट सेवा प्रवाह गरिरहेको थियो ।
महानगरको अहिले केन्द्रीय कार्यलय सुन्धारामा छ भने वातावरण विभाग टेकुमा, राजश्व विभाग बबरमहलमा, सहकारी विभाग बिजुलीबजार, शिक्षा विभाग ताहाचल, केही विभाग राष्ट्रिय सभा गृहमा गरी विभिन्न १० स्थानबाट सेवा प्रवाह गरिरहेको छ।
