धनगढी । धनगढीको कैलाली बहुमुखी क्याम्पसमा स्ववियु निर्वाचनको मतगणना रोकिएको छ ।
सुदूरपश्चिम विश्वविद्यालयको आंगिकसमेत रहेको कैलाली क्याम्पसमा बुधबार अपराह्न ४ बजे सकिएको मतदान बिहीबार बिहानसम्म गणना हुन सकेको छैन । विद्यार्थी संगठनहरुबीच मतगणना कुन ठाउँमा गर्ने भन्ने विषयमा सहमति हुन नसक्दा गणनामा ढिलाइ भइरहेको हो ।
अनेरास्ववियु, अनेरास्ववियु (क्रान्तिकारी), स्वतन्त्र विद्यार्थी समूहलगायतका संगठनले प्रदेश स्वास्थ्य तालिम केन्द्र वा कैलाली उद्योग वाणिज्य संघमा मतगणना गर्नुपर्ने माग गरेका छन् । यस्तै, नेविसंघले पनि गणना क्याम्पसमै हुनुपर्ने माग गरेको छ ।
स्ववियु निर्वाचन समितिले मतगाणनाका सम्बन्धमा छलफल गर्न विद्यार्थी संगठनसहितको बैठक बोलाइएको बताएको छ । बैठकपछि सहमतिमा मतगणना स्थल र समय निर्धारण गरिने बताईएको छ ।
स्ववियु निर्वाचनमा कैलाली बहुमुखी क्याम्पसबाट दुई हजार तीन सय ६८ मत खसेको थियो ।
