गोरखा । प्रधानमन्त्री पुष्पकमल दाहाल प्रचण्डले सरकारलाई पूर्णता दिनेबारे छलफल सुरु भएको बताउनुभएको छ ।
मंगलबार पालुङटार नगरपालिका–२ विमिरेमा पन्थडिही–कटहरे–हर्मी–साहिलीटार सडकको शिलान्यास गर्दै उहाँले सरकारलाई पूर्णता दिने विषयमा नेपाली कांग्रेससहितका दलसँग मंगलबार बिहानदेखि छलफल सुरु भएको बताउनुभयो ।
हिजोदेखि पुन: राजनीतिक वातावरण बनेको र लय पक्रिएको भन्दै उहाँले सदनमा भएका ११ पार्टीले विश्वासको मत दिएपछि सरकारलाई पूर्णता दिने पक्षमा भएको बताउनुभयो ।
देशलाई सुशासन सामाजिक न्याय र समृद्धिको अभियानतर्फ लैजाने भन्दै प्रधानमन्त्री प्रचण्डले जनताको विकास निर्माण र समृद्धिको आकांक्षा सम्बोधन गर्न संघ, प्रदेश र स्थानीय तहसँग एकीकृतरुपमा अघि बढ्ने उल्लेख गर्नुभयो ।
उहाँका अनुसार सरकार गठन पुनर्गठन गर्ने कुरामा छलफल भइरहेको छ र प्रदेश सरकारलाई आलोपालो प्रणालीबाट पूर्णता दिने विषयमा छलफल चलिरहेको छ ।
“जनताको विकास निर्माण समृद्धिको आकांक्षा सम्बोधन गर्न एकीकृतरूपमा काम अघि बढाउन, केन्द्र, प्रदेश र स्थानीय तहको समन्वय गर्न बृहत्तर बैठकको आयोजना गर्दैछु, त्यो छलफलमा देशभरको विकासलाई कसरी गति दिने गम्भीर छलफल हुन्छ”, उहाँले भन्नुभयो ।
