काठमाडौँ । नेकपा (एकीकृत समाजवादी)को महासचिवमा घनश्याम भुसाल मनोनित भएका छन् । आइतबार पार्टी कार्यालय आलोकनगरमा बसेको सचिवालयको बैठकले भुसाललाई पार्टी महासचिवमा मनोनित गरेको हो ।
यसअघि एकीकृत समाजवादीको महासचिव बेदुराम भूसाल रहेका थिए । उनी भने उपाध्यक्ष मनोनीत भएका छन् । घनश्यामलाई महासचिव तथा बेदुरामलाई उपाध्यक्षमा मनोनित गरिएको प्रवक्ता जगन्नाथ खतिवडाले जानकारी दिए ।
घनश्याम नेकपा एमाले छाडेर मंसिर ४ मा सम्पन्न प्रतिनिधिसभा निर्वाचनमा स्वतन्त्र लडेका थिए । निर्वाचनमा पराजित भएपछि भुसाल एकीकृत समाजवादीमा प्रवेश गरेका थिए ।
यस्तै, बैठकले ४ उपाध्यक्ष घनेन्द्र बस्नेत, केदार न्यौपाने, धर्मनाथ साह र केशवलाल श्रेष्ठलाई केन्द्रिय सचिवालय सदस्यमा मनोनित गरेको छ ।
समाजवादीले सरकारलाई विश्वासको मत दिने निर्णय गरेको र आजबाट सत्ता पक्षको कुर्सीमा बस्ने निर्णय गरेको छ । सरकारमा जाने वा नजाने भन्नेबारेमा टुंगो भइ नसकेको खतिवडाले बताए ।
