काठमाडौँ । जनता समाजवादी पार्टीका अध्यक्ष उपेन्द्र यादवले रामसहायप्रसाद यादव उपराष्ट्रपतिमा निर्वाचित हुनुले स्वच्छ राजनीति गर्नेहरुलाई प्रोत्साहन मिल्ने बताउनुभएको छ ।
शुक्रबार उपराष्ट्रपतिमा सत्तारुढ गठबन्धनका उम्मेदवार रामसहायप्रसाद यादव निर्वाचित भएसँगै सञ्चारकर्मीहरुलाई संक्षिप्त प्रतिक्रिया दिँदै अध्यक्ष यादवले नवनिर्वाचित उपराष्ट्रपति यादव इमान्दारिता र स्वच्छ छविको प्रतिकको रुपमा रहनुभएको बताउनु भयो । उहाँले यादवको विजयले स्वच्छ राजनीति र स्वच्छ छवि भएकाहरुका लागि भविष्यमा राजनीति गर्न प्रोत्साहन मिल्ने बताउनु भयो । उहाँले नवनिर्वाचित उपराष्ट्रपतिको विजय सबैको विजय भएको प्रतिक्रिया दिनुभयो ।
उहाँले भन्नुभयो – ‘अब के हो भन्दाखेरी एउटा इमान्दारिता र स्वच्छ छविको प्रतिकको रुपमा उहाँ हुनुहुन्थ्यो । र उहाँको यो विजयले स्वच्छ राजनीति र स्वच्छ छविलाई, अर्को व्यक्तित्वलाई प्रोत्साहन दिनेछ भविष्यमा । र उहाँको यो विजय सबैको विजय हो ।’
त्यसैगरी सञ्चारकर्मीहरुलाई संक्षिप्त प्रतिक्रिया दिँदै नेपाली काँग्रेसका उपसभापति पूर्णबहादुर खड्काले उपराष्ट्रपति रामसहायप्रसाद यादवको विजयलाई स्वभाविक रुपमा लिनुपर्ने प्रतिक्रिया दिनुभयो । उहाँले यादवको विजयमा गठबन्धन दलहरु खुशी भएको बताउनु भयो ।
उहाँले भन्नुभयो – ‘अब यो लोकतान्त्रिक प्रक्रियामा लोकतान्त्रिक प्रतिष्पर्धा र स्वभाविक रुपमा अरु उम्मेदवारहरु भन्दा उहाँले धेरै भोट ल्याउनुभयो । विजय प्राप्त गर्नुभयो । यसलाई स्वभाविक रुपमा लिनुपर्छ । र हामी विशेषगरी उहाँलाई समर्थन गरेर जिताउने दलहरु हामी खुशी छौँ । हामी उहाँलाई नेपाली कांँग्रेस पार्टीको तर्फबाट निर्वाचित उपराष्ट्रपतिजीलाई धेरै धेरै बधाई दिन चाहन्छौँ । उहाँको कार्यकाल पूर्ण रुपमा सफल होस् । शुभकामना दिन चाहन्छु ।’
उहाँले नवनिर्वाचित उपराष्ट्रपति यादवलाई नेपाली काँग्रेस पार्टीको तर्फबाट बधाई तथा शुभकामना व्यक्त गर्नुभयो ।
