काठमाडौँ । नेकपा (एमाले) का अध्यक्ष केपी शर्मा ओलीले नेपाली कांग्रेसलाई प्रतिपक्षमा भेट्न २०८४ साल पर्खनु नपर्ने बताउनुभएको छ ।
संघीय संसद् भवन नयाँ बानेश्वरमा उपराष्ट्रपतिमा मतदान गरेर बाहिरिने क्रममा उहाँले कांग्रेस महामन्त्री गगन थापालाई जवाफ दिँदै उक्त कुरा बताउनुभएको हो ।
फागुन २५ गते भएको राष्ट्रपति निर्वाचनमा मत हालेर बाहिरिने क्रममा अध्यक्ष ओलीले कांग्रेससँग नमिल्ने भनेर आफूले कसम नखाएको बताउनुभएको थियो । त्यसको जवाफमा कांग्रेस महामन्त्री थापाले २०८४ सम्म त्यस्तो सम्भव नभएको बताउनुभएको थियो ।
शुक्रबार ओलीले भन्नुभयो, “एकजना अलिक चर्का कांग्रेसले कति सालपछि भेट हुन्छ भन्नुभएछ । प्रतिपक्षमा भेट्न ०८४ साल पर्खिनुपर्छ ? अहिले भेट्नुभएको छैन । उहाँहरूको यो कुराले उहाँहरूभित्र निकै ठूलो गडबडी देखिन्छ । नत्र किन त्यस्तो बोल्नुपर्यो ? त्यहाँभित्र गडबडी होलान् । त्यसैकारण बोल्नुभएको हो कि ?”
लोकतान्त्रिक प्रणालीमा हारजित स्वाभाविक भएको उहाँको भनाइ थियो । उहाँका अनुसार अहिले साँठगाँठको सिस्टम भएको छ । उहाँले भन्नुभयो, “यसमा कसले जित्यो कसले हार्यो ? कसको शक्ति कति भन्ने नै भएन ? अहिले त जनमत पार्टीले उपराष्ट्रपतिमा उम्मेदवार उठाएको छ । यस्तोमा के हिसाब हुन्छ ।”
