काठमाडौँ । उपराष्ट्रपति पदकी उम्मेदवार अष्टलक्ष्मी शाक्यले निर्वाचन आफू अनुकूल हुँदै गरेको बताउनुभएको छ ।
संसद् भवन नयाँ बानेश्वरमा शुक्रबार पत्रकारहरुसँग उहाँले राष्ट्रपति निर्वाचनमा अनुकूल नभए पनि उपराष्ट्रपति निर्वाचन आफू अनुकूल भएको बताउनुभयो ।
उहाँले भन्नुभयो, “निर्वाचनमा अनेकौँ चलखेल हुन्छन् तर यसमा मैले श्रेष्ठता हासिल गर्नेछु ।” स्वस्थ, अस्वस्थ, मर्यादित र अमर्यादित जस्ता अनेकौँ चलखेल भए पनि त्यसमा श्रेष्ठता हासिल गर्ने उहाँको भनाइ थियो ।
संविधानमा राष्ट्रपति र उपराष्ट्रपति फरक लिंग वा समुदायको हुनुपर्ने लेखिए पनि राष्ट्रपति पुरुष भएकाले उपराष्ट्रपति महिला नै हुनुपर्ने उहाँको जिकिर थियो ।
