काठमाडौं । आइसिसी विश्वकप लिग २ मा पपुवा न्युगिनीविरुद्धको खेलमा स्पिनर सन्दीप लामिछाने प्लेयर अफ द म्याच बनेका छन् । नेपाललाई ९ विकेटको जित दिलाउन सन्दीपले महत्वपूर्ण पाँच विकेट लिएका थिए ।
सन्दीपको उत्कृष्ट बलिङमा नै पपुवा न्युगिनी २२.५ ओभरमा ९५ रनमा अल आउट हुन पुग्यो । उनले १० ओभरमा १ मेडनसहित २५ रन खर्चेर ५ विकेट लिए । सन्दीपले आफ्नो अन्तिम बलमा सेमो कमियालाई बोल्ड गर्दै ओडिआई करिअरमा तेस्रो पटक पाँच विकेट पूरा गरेका थिए ।
९६ रनको लक्ष्य पाएको नेपालले ७.४ ओभरमा १ विकेट गुमाउँदै पूरा गर्यो । नेपालको जितमा ओपनर आसिफ शेखले २१ बलमा ८ चौका र ३ छक्कासहित ५३ रनमा अविजित रहे । नेपाल ३५ खेलमा १८ जित र १५ हारसहित ३८ अंकका साथ चौथो स्थानमा छ।
नेपालले अन्तिम खेलमा बिहीबार युएईलाई पराजित गरे जिम्बावेमा हुने एकदिवसीय विश्वकप छनोट सोझै खेल्न पाउँछ । पराजित भएमा पनि नेपालले यसै महिना अन्तिममा नामिबियामा हुने क्वालिफायर प्लेअफ खेल्नेछ ।
